Кёгетлени багъалары тюшгендиле

Быйыл август айда Къабарты-Малкъарда багъала, июль бла тенглешдиргенде, 0,6 процентге азайгъандыла, деп билдиргендиле РФ-ни Банкыны республикада бёлюмюнден. Анда айтханларына кёре, ол алай болгъаныны сылтауу – бир-бир продуктла асламыракъ чыгъарылгъаны бла байламлыды. Тирлик жыйыу башланнганы бла, сёз ючюн, тахта кёгетле эмда жемишле учузуракъ болмагъандыла – бир айгъа аланы багъалары 13,3 процентге тюшген эдиле. Бегирекда картофну, быхыны, соханны, жюзюмню, хобустаны, томатланы эмда чибижини. Къуру бизде угъай, саулай къыралда производство кенгертиле баргъаны себепли жумуртхала да учузуракъ турадыла.

Бир-бир жумушланы багъалары тюшгендиле. Сёз ючюн, Къара тенгизни жангысында эмда Кърымда солуу 23,5 процентге учузуракъ болгъанды. Ол а сурам азайгъаны ючюндю.

Башха жаны бла алып къарагъанда,  аш-азыкъгъа саналмагъан бир-бир товарланы багъалары кётюрюлгенин белгилерге тийишлиди. Кюз-къыш кезиулени аллында тюклю тонла ючюн кёбюрек тёлерге тюшерикди. Телевизорла уа энди азыракъ турадыла. Банклада ставкала энтта да бийик болгъанлары себепли адамла,  ахчаларын къоратмай, къыстырыкъ этип турургъа кюрешедиле, аллай товарланы уа кёбюсюнде кредитге аладыла.

Жыллыкъ инфляция Къабарты-Малкъарда тёртюнчю ай азая барады. Августда къыралда инфляция  орта кёрюмдюге (8,1%) окъуна жетмегенди, ол а – 7,5 процентди. Саулай Россейде да ол тюше барады, алай белгиленнген марда тенгли уа энтта да болмагъанды. Келир жылда ол тёрт процентде тохташыр ючюн,  Банк ставканы тийишли чекде тутуп турлукъду.