Жорукъла сакъланмагъанларыны ахыры - бушуу

Россейни СК-сыны КъМР-де следствие управлениясыны Урван районда бёлюмюню къуллукъчулары къурулуш компанияладан бирини башчысына терслеу материалла ачхандыла. Ол къурулуш ишле ётген кезиуде къоркъуусузлукъну жорукълары сакъланмай, аны хатасындан ишчи ауушханы ючюн терсленеди.

Ведомстводан бизге билдиргенлерича, быйыл 15 июльда Нарткъалада Къабарты орамда 9 къатлы юйде вентиляция баргъан жерде  жангыртыу жумушла бардырылгъан кезиуде ишчи шахтагъа жыгъылгъанды. Алгъан жараладан ол алайда ауушханды.

Фирманы башчысы къурулуш бардырылгъан жерде ишчилени къоркъуусузлукъларын жалчытыргъа борчлуду. Болсада ол урунууну сакълау низамгъа бузукълукъла этип, бийикликде къурулуш ишлени толтурургъа профессионал билими болмагъан адамны къойгъанды.  Андан сора да, ишчини саулугъун, жашауун сакълауда керекли оборудованиясы болмагъанды.   

Бу шартла бла байламлы РФ-ни УК-сыны 216-чы статьясыны 2-чи кесегине кёре терслеу материалла ачылгъандыла. Уголовный иш къабыл кёрюлюп, сюдню къараууна берилгенди.