Айранны космосда тинтирикдиле

«Бион-М №2» биоспутникде илму ишлени кезиуюнде къарачайлыланы бла малкъарлыланы тёрели суусаплары айран бла кефир да тинтилликдиле, деп билдиредиле РИА КЧР агентствода.

  Спутник Байконурдан жиберилгенди, тинтиуле уа РАН-ны медико-биология тинтиулени бардыргъан институту бла Алийланы У.Д. атлы Къарачай-Черкес къырал университетни бирге жарашдырылгъан проектлерини чегинде бардырыладыла. Анга кёре, алимле космосха учуу сау микроорганизмлени халларын къалай тюрлендиргенине къарарыкъдыла, бу ишге жууаплы профессор Текейланы Алимурат (КъЧКъУ) бла Вячеслав Ильиндиле (ИМБП РАН).      

    «Бион-М №2» биоспутникде микроорганизмле, битимле эм башха биология объектле бла байламлы тинтиулени саны отузгъа жетеди. Аппарат кеси кюн-синхрон орбитагъа чыгъарылады, анда уа космос радиация МКС-ден кёпге да уллуду. Учуу саулайда 30 кюнню алады.

Университет къошумчулукъну айранны бла кефирни жарашдыргъанда керекли микроорганизмлени тинтиуге этеди, биоматериалны патентни иеси медицина илмуланы доктору, Россейни сыйлы врачы, Информатизацияны халкъла аралы академиясыны академиги Текейланы Алимурат бергенди. «Роскосмосдан» айтханларына кёре, «Бион-М №2» биоспутникле тинтиулени эсеплери артда адамланы узакъ полярный орбиталагъа учургъанда хайырланырыкъдыла. «Билмей тургъанлай чыкъгъан экстремал болумла адамны саулугъуна, жашаууна да уллу къоркъуу саладыла. Аны бла байламлы алимле аланы физиология, психология жаны бла да хаталарын азайтыуну амалларын сюзерикдиле. Ала чыгъаргъан эсепле адамны жер башындан башха болумлагъа тюзелиюуюне себеплик этерикдиле, айран бла кефир а космосха учхан экипажлагъа берилликдиле», - деп белгилегенди профессор.