Алчы окъуу махкемелени тизмесине тюшгенди

Республикада «Кюн шахар» сабий чыгъармачылыкъ академия ачылгъанлы бери да ары жюрюген жашла бла къызла дайым да жетишимли болгъанлай, билимлерин ачыкълагъанлай келедиле. Быйыл да аны хунерлилеге лицейи, Окъуучуланы битеуроссей олимпиадаларыны (ВсОШ) башха-башха ахыр урумларыны эсеплерине тийишлиликде, аны алчыларыны тизмесине тюшгенди. Олимпиада уа мартда башланып майгъа дери 24 окъуу предметден бардырылыучусун барыбыз да билебиз.

«Кюн шахарны» хунерлилеге лицейи сагъынылгъан тизмеге уа быйыл биринчи кере кийирилгенди. Битеу да жетишимлери бла бирге уа аны къоруулау-спорт ызда алчылыгъын белгилерчады.

Мында билим берген устазланы иш кёллюлюклерини, салгъан муратларына жетер ючюн къадалып эмда тири кюрешгенлерини, окъутханларын олимпиадалагъа тынгылы хазырлай эмда терен халда окъута билгенлерини себеплиги бла хунерлиле жюрюген лицейни аты федерал даражада ахшы бла айтылгъанды. Ол окъуу махкемеге, сёзсюз, кезиулю жетишим болгъаны бла бирге устазланы, сабийлени да кёллерин кётюргенди.

Озгъан окъуу жылда уа Битеуроссей дерс олимпиаданы ахыр къырал урумунда сегиз сабий ОБЗР-ден, географиядан эмда экологиядан алчыла эмда призёрла болгъанларын белгилерчады. Аланы араларында уа Къулбайланы Алий, Жангуразланы Нуржан, Занкишиланы Саида, башхала да болгъандыла. Бюгюнлюкде жашла бла къызла къыралыбызны башха-башха белгили окъуу юйлерини студентлеридиле.

Андан сора да, бу кюнледе «Кюн шахар» сабий чыгъармачылыкъ академияны хунерлилеге лицейине жюрюгенле «Уллу перемена» Битеуроссей эришиуню жарым финалына да къатышхандыла.