Предпринимательлеге берилген онгланы юсюнден айтылгъанды

Къабарты-Малкъар къырал аграр университетде ётген ачыкъ лекциягъа республиканы экономиканы айнытыу министрини орунбасары Ольга Белецкая да къатышханды. Ол окъуучулагъа гитче эмда орта предпринимательствогъа къырал болушлукъну юсюнден хапарлагъанды.

Бюгюнлюкде республикада гитче эмда орта предпринимательствогъа себеплик этиу бла бир ненча организация эмда къырал структура кюрешеди, ол санда: «Мени бизнесим» ара, Къабарты-Малкъар Республиканы Гарантияла фонду, МСП субъектлени аз ёлчемли кредитле бла жалчытхан фонд, дагъыда талай муниципалитетде къуралгъан бизнес-инкубаторла.

«Мени бизнесим» ара предпринимательлеге кёп жаны бла билеклик этеди, информация-консультация эмда билим бериу жумушла бла жалчытады, бизнесни эсепге салыргъа болушады, бизнес-планла жазаргъа эмда къыралдан болушлукъ алыргъа себеплик этеди. Гарантияла фонд а кредит эмда лизинг келишимлеге поручительство этип, алагъа банкладан эмда башха финанс структураладан ёнкюч ахча алыргъа болушады.

Микрофинанс организация гитче эмда орта предпринимательство бла кюрешгенлеге аз ёлчемли займла береди, бизнес-инкубаторла уа мюлк эмда ырысхы бла себеплик этедиле.

Министерствода белгилегенлерича, быллай онгла «Къыйматлы эмда конкуренциягъа чыдамлы экономика» миллет проектге кирген «Гитче эмда орта предпринимательство, энчи предпринимательство башламчылыкълагъа себеплик этиу» федерал проектни чеклеринде бериледиле.