Россейни рекордла китабына жазылгъанды

Газетибизде алгъаракълада билдиргенибизча, Россейни Къырал байрагъыны кюнюнде белгили спортчу альпинизмден спортну устасы, скайраннингден бла ски-альпинизмден къыралны чемпиону Виталий Шкель Минги таугъа чабыуда рекорд тохташдыргъан эди.

50-жыллыкъ спортчу 6 сагъатны 29 минутну бла 08 такъыйкъаны ичинде «альпинист жор» деген маршрутну ётгенди. Анга Минги тауну эки тёппеси да киредиле, жолну узунлугъу - 30 километр, бийикликлени тюрлениулери уа 7 минг метр болгъандыла, скайраннинг бла кюрешгенле аны талай кюнню ичинде ётюучюдюле. Бу жетишим Россейни рекордла китабына кийирилгенди, деп билдиредиле республиканы Курортла эм туризм министерствосундан.

Виталий эндиге дери да талай рекорд салгъанды, ол санда Ленинни атын жюрютген къаягъа, Казбекге, 2020 жылда Минги таугъа чабыуда (ол Азау таладан Элбрусну кюнбатыш тёппесине 3 сагъат бла 10 минутну ичинде жетгенди, артха жолу да жангызда 1 сагъатха кёп болгъанды, алай бла бир кереге 2 рекорд тохташдыргъанды).  Чабыуну къураргъа себепликни тау хазырланыуну  «Терскъол» арасы, «Рольф» автодилер биригиу бла республиканы Альпинизмден, таулагъа ёрлеуден бла спорт туризмден федерациясы этгендиле.