Предпринимательлеге болушлукъ хайырлыды

Шимал Кавказ федерал округда гитче эмда орта предпринимательствону онгдуруу жаны бла программаны чеклеринде битеу да 7,5 миллиард сом багъасына 200 келишим этилгенди. Ол санда 1,5 миллиард сом бла аланы Кавказ.РФ жалчытханды. Бу программаны хайырындан саулай 18,4 миллиард сом тургъан къадар проект бардырылады, деп билдиргендиле Кавказ.РФ айнытыу институтдан.

«Алгъын болгъан ключевой ставкагъа да къармай, 2022 жылда башланнган бу программаны чеклеринде себеплик этиуге бериллик ахча кёп къалмай толусунлай хайырланылгъанды. Келишим бла Сбер да Кавказ.РФ-ден 1,5 миллиард сом багъасына болушлукъ кёргенди. Бу ахча Шимал Кавказда гитче эмда орта предпринимательствогъа инвестицияларына эмда башха тюрлю жумушларына жарарча деп берилгенди», - дегенди Кавказ.РФ-ни башчысыны биринчи орунбасары Андрей Цемахович.

«Биз Кавказ.РФ бла бирге бардыргъан программа къыйматлы болгъанды. Ол гитче эмда орта предпринимательство бла кюрешгенлени эки жюз чакълы проектлерин башларгъа эмда айнытыргъа себеплик этгенди. Биз да, Сбербанкны Къыбыла-Кюнбатыш бёлюмюнде, 7,5 миллиард сом багъасына учуз кредитле бергенбиз. Программа башланнган кезиуде ары жаланда талай республикада ишлеген компанияла кире эдиле. Былтыр а Ставропольеден бизнесге да жол ачылгъанды: андан кёп предпринимательле къоншу Кавказ регионлагъа кеслерини инвестиция проектлери бла кирирге хазырдыла неда эрттеден бери ишлейдиле. Бу амалны Ставропольеден онжети бизнес-проектни къурагъанла хайырланнгандыла. Алай бла бизни (льготалы кредитле бла жалчытхан) программа Кавказны инвестициялы онгларын айнытыугъа иги къошумчулукъ этгенди дерге боллукъду. Нек дегенде, бизнесге берилген болушлукъну хайыры къадар бёлюмлеге жетеди, тийрелени инвесторлагъа тийишлисича кёргюзтеди, миллионла бла тергелген инсанланы жашау болумларын игилендиреди», - деп къошханды Сбербанкны сагъынылгъан бёлюмюню башчысы Анатолий Песенников.

Учуз кредитлени СКФО-да битеу жети субъектде хайырланнгандыла. Эм тири Шимал Осетиядан предпринимательле болгъандыла (66), ызы бла Къабарты-Малкъарны келечилери барадыла (44), ючюнчю жерде уа Дагъыстанды (43).

Эм багъалы проектле уа (7 миллиард сомдан артыкъ тургъан) Ингушетия Республикадандыла. Бу программаны хайырындан округну экономика жаны бла бар онглары ачыкъланадыла эмда айныйдыла, ол а агропромышленность, туризм, къурулуш, производство эмда жумушла бла жалчытыу сфераладыла.

«РФ-ни Ара банкы 2025 жылда июльда ключевой ставканы азайтханы ючюн бу программаны чеклеринде берилген кредитлени багъалары да тюшгенди. Аны себепли болушлукъ СКФО-да предпринимательлеге бютюнда учуз келеди, ала кеслери да аны женгилирек алаллыкъдыла. Ол а регионда бизнесге жангы онгла береди», - дегенди Андрей Цемахович.