Чирик кёлню тийресин тазалагъандыла

Озгъан шабат кюнде КъМР-ни табийгъат байлыкъла эмда экология министри Шауаланы Илиясны башчылыгъы бла Чирик кёлню тийресинде субботник бардырып, къаты къалгъан-къулгъанладан бла кир-кипчикден тазалагъандыла. Анга Энчи табийгъат жерлени сакълагъан, Черек районну агъач мюлк учреждениясы эм Орус география биригиуню (РГО) келечилери, саулай алып айтханда, эллиге жууукъ адам къатышхандыла. 

Бу жол акцияны кезиуюнде кёлню жагъаларындан тышында,  драйверлени кючю бла онбеш метр теренликде да зыбыр къалгъан-къулгъанла чыгъарылгъандыла.  
Белгилисича, Чирик кёлле туристле аслам келирге сюйген  республиканы табийгъат тамашаларындан бирлеридиле. Ол себепден жыл сайын жаз башында бла къыркъарда аны жагъаларында санитар болумну игилендирирча субботник бардырылады. 

Жарсыугъа, къонакъланы бир къаууму экологиягъа заран салырбыз, табийгъатны ариу сыфатын бузарбыз деп къайгъырмай, кеслеринден сора пластик, мияла шешаланы, пакетлени эм башха затланы да атып кетедиле.   
Чирик кёлню тийресинде кир-кипчикни атарча орунла эм контейнерле бардыла. Аш-суудан къалгъан аберилени алагъа атаргъа къыйын тюйюлдю. Адам бирсилени да сагъышын этерге, табийгъатны бетин бузмазгъа, заран салмазгъа тийишлиди.

Эсге сала айтсакъ, Черек районда бир бирден узакъ болмагъан беш кёл барды: Къургъакъ, Жашырын, эки Огъары эм белгили Чирик кёл. Алай табийгъатны эм сейир эсгертмесине жол юсюндеги Чирик кёл саналады. Ол тенгизден 809 метр бийикликдеди, уллулугъу эки гектар чакълы барды. Кёлге бир тюрлю суу къошулмагъанлыкъгъа, тышына бир суткагъа 77 минг кубометрден асламы саркъады. Аны ючюн ол азаймайды, жылылыгъы да, жылны узунуна тюрленмей, +9 градуслай турады. Бюгюнлюкде аны тохташдырылгъан теренлиги 279 метрге жетеди.