Юй къанатлыланы жайыуда ‒ жангы жорукъла

Эл мюлк къанатлыланы жайыуда быйыл 1 сентябрьде жангы жорукъла кийирилгенини юсюнден Россельхознадзорну Шимал Кавказда Управлениясындан билдиргендиле. Ол излемле РФ-ни Эл мюлк министерствосуну 2025 жылда 26 мартда чыкъгъан 188-чи номерли буйругъу бла тохташдырылгъандыла. Кеслери да битеу тюрлю мюлклеге жетедиле – иели фермаладан башлап, уллу птицефабрикалагъа дери.

Жангы излемледе ветеринария жаны бла къоркъуусузлукъну жалчытыугъа, аурууланы профилактикасына, къанатлыланы кечиндирген жерледе тазалыкъгъа энди аслам эс бурулады. Документде карантин жумушланы тамамлаугъа, профилактика эмда диагностика тинтиулени бардырыугъа, талай башха жумушлагъа излемлени юсюнден да айтылады.

Бу жорукълада эм магъаналы тюрлениу – къанатлыланы ачыкъ жерледе тутаргъа чек салыу бла байламлыды. Мында жаланда бир эркинлик барды – аланы бегитилген («солярий») тийреледе кечиндириу. Ол а неге керекди десегиз – аланы ичинде ауруула жайылмазча.

«Солярий» деген не затды?

Ол юй къанатлыланы тышына чыгъарып кечиндирген тийреди. Аны тёгереги буруу бла бегитилип, башы да жабылып болургъа керекди. Алай этилсе, къанатлылагъа тышындан заран жетмейди, кийик жаныуарладан неда башха затладан да ауруула жукъмайдыла.

Жангы жорукъланы заманы жетгени бла 2006 жылда 103-чю эмда 104-чю номерли буйрукъла бла кийирилген ветеринария жаны бла мардала кючлерин тас этедиле. Алада юй къанатлыланы иели арбазлада эмда фабрикалада жайыуну юсюнден айтыла эди. Энди уа мюлклени бар тюрлюлери бир излемлеге бойсунурукъдула, аны хайырындан контроль, къоркъуусузлукъ да кючлюрек боллукъдула.

Бу тюрлениулени юсюнден толуракъ хапар билирге сюе эсегиз Россельхознадзорну Къабарты-Малкъарда бёлюмюне сёлешигиз: 8 (8662) 77-82-49, 8 (8662) 77-81-94.