КъМР-ни ал кезиулеринден

Бизни республика къуралгъанлы 1925 жылда 1 сентябрьде тёрт жыл толгъан белгилегендиле. Аны къалай белгилегенлерини юсюнден «Известия» газетни ол кюн чыкъгъан (198) номеринде да жазгъандыла.

«Къабарты-Малкъар автоном областьны уруннган халкъы бу кюн кеслерини автономияларына тёрт жыл толгъанын байрам халда белгилейдиле. Ол заманны ичинде областьда совет власть бек уллу иш тындыргъанды. Аны санында бир ненча жюз километр (верста) арыкъла жарашдырылгъандыла, тау сыртлада жолла созулгъандыла, череклени жагъалары бегитилгендиле, башха жумушла да тындырылгъандыла. Ала бары да Къабарты-Малкъар область айный баргъаныны белгилеридиле. Алай анга шагъатха энтта да башха юлгюле бардыла.

Сёз ючюн, быйыл мартда Нальчикде Трек кёлню къатында гитче электростанция ишлеп башлагъанды. Ол къуру шахарны угъай, жууукъ эллени да ток бла жалчытады. Дагъыда 200 минг чакълы десятина (1 гектардан аз аслам) жерлени планировкалары этилгенди, чеклери да тохташдырылгъанды. Басхан сууда уа бютюнда кючлю гидроэлектростанцияны къурулушу бардырыллыкъ тийреде тинтиу ишле бошалыргъа кёп къалмагъанды.

Минги таудан узакъ бармай, Гара сууланы таласыны къатында дуния даражалы курорт ишленип башлагъанды. Саулай областьда уа бир ненча кёпюрню къурулушлары барады. Дагъыда быйыл 1 майда энтта да юч минг инсан («ликбезлени» тауусуп) окъуулу болгъандыла.

Бу тёрт жылны ичинде иги кесек зат этилгенди, алай иш энтта да бек кёпдю. Юлгюге, областьда жашагъанланы 98 процентинде билимлери жокъду. Алай иш нечик къазауат, тири баргъанына кёре, мында да жууукъ кезиуде бизни уллу хорламла сакълагъанына ишексиз болурчады».

Суратда Нальчикде Трек кёлню къатында орнатылгъан ГЭС-ди.