Кредит каникуллагъа ким чыгъаргъа боллукъду?

Бюгюнлюкде Къабарты-Малкъарда гитче эмда орта предпринимательство бла 22 мингден артыкъ инсан кюрешедиле. Кеслери иш къурап къармашханланы саны уа 90 мингнге жете къалады, деп билдиргендиле республиканы Экономиканы айнытыу министерствосундан.

Бу къауумлагъа кирген инсанладан къайсысы да кредит алып болса, ол аны тёлеген кезиуде кредит каникул деген амалны хайырланыргъа боллукъду. Башхача айтханда, тёлеу бериуню бир кесек заманнга тыяргъа. Аллай онг быйыл 1 октябрьде кюч аллыкъ 276-ФЗ номерли федерал закон бла берилликди. Аны уа 2024 жылда 1 мартдан сора кредит алгъанла хайырланыргъа боллукъдула.

Мында талай излем барды. Биринчиден, кредитни ёлчеми РФ-ни Правительствосу тохташдыргъан мардадан озмазгъа, аны кесини излемлери уа беш жылны ичинде тюрлендирилмей турургъа керекдиле. Ахчаны алгъан инсанны юсюнден айтханда, гитче неда орта предпринимательство категориялагъа кирмеген предприятияны неда организацияны уставной капиталында тёртден биринден асламысы анда болмазгъа, аны кесини аллай биригиуюню капиталына да быллай адам къатышмазгъа керекди.

Кредит каникул излеген инсан банкрот болмазгъа, аны биригиую ишин тюрлендире неда чачыла турмазгъа тийишлидиле. Адам ахчасын къайтарыу неда аны процентлерин тёлеу жаны бла этген борчларыны болжаллары бир жылны ичинде 30 кюнден артыкъ болмазгъа керекди. Дагъыда ол кредитин заманындан алгъа къайтарырча сылтау чыкъмазгъа.

Бу излемлени толтурса, кредити болгъан инсан аны къайтарып бошагъынчы дери къачан сюйсе да быллай каникул излерге эркинди. Аны болжалын (6 айдан кёп жарамайды) ол кеси тергейди. Алай болмаса уа кредит берген организация аны жарым жылгъа жарашдырлыкъды.

Бу законну кючю микрофинанс организацияла бериучю займлагъа жетмейди.