Жангыртылгъан объектле бла шагъырейленнгендиле

Кёп болмай РФ-ни Президентини Шимал-Кавказ федерал округда толу эркинликли келечиси Юрий Чайканы болушлукъчусу Сергей Никитин ишчи жолоучулугъуну чеклеринде Къабарты-Малкъарда болгъанды. Аны кезиуюнде ишчи кенгешге къатышханды эм миллет проектлеге  кёре ишленнген  бир къауум объектни да  жокълагъанды. Ол санда   КъМР-ни Правительствосуну Председателини орунбасары Марат Хубиев, эл мюлк министри Хасан Сижажев, Нальчик шахар округну администрациясыны башчысы Таймураз Ахохов эм башхала  бла бирге  Къабарты-Малкъар Аграр университетде билим бериу-лаборатор корпусда жангыртыу ишле къалай баргъанларына да  къарагъандыла, деп билдиредиле КъМКъАУ-ну пресс-службасындан.  

Тынгылы ремонт ишле «Аш-азыкъ жаны бла къоркъуусузлукъну эм технологиялы жалынчакъсызлыкъны жалчытыу» миллет проектге кирген «Агропромышленный комплексге кадрла хазырлау»   федерал программагъа кёре барадыла. Ол проектге кёре, болжалдан кеч къалмай тамамланады. Планнга тийишлиликде объект юч жылны ичинде хайырланыргъа берилирге керекди.

Тийишли ишлени кезиуюнде мекямны башында къанжалларын, инженер ызларын алышырыкъдыла,  ичин сюртюп-бояп омакъ этерикдиле, жанында модуль котельна ишлерикдиле  эм арбазы да айбатландырыллыкъды.

Саулай алып айтханда, сагъынылгъан ишлеге бюджетден 1,5 миллиард сом чакълы бир къоратыллыкъды, аны тышындан,  башха ахча къошумчулукъ да этилликди.

Андан сора да, Серегей Владимирович федерал проектни  КъМКъАУ-ну мурдорунда    къуралгъан  «Усталыкъланы шахары» деген жаш адамлагъа  усталыкъ сайларгъа болушхан майданыны къурулушу бла да шагъырейленнгенди. Ол КъМР-ни Эл мюлк министерствосуну  эм башха ведомстволаны  болушлугъу бла къуралгъанды, быйыл сентябрьде хайырланыргъа берилликди.