Окъуучулагъа аламат онгла къуралгъандыла

Нальчикни 14-чю гимназиясында къууанчлы жалда бардырылгъан линейкасына къатышханма, мен анда тамата класслада окъугъанма, сабийлени эм аланы ата-аналарын, устазланы да жангы окъуу жыл башланнганы бла жюрегимни теренинден алгъышлагъанма, деп жазгъанды КъМР-ни Башчысы Казбек Коков кесини телеграм-каналында.

«Гимназия 1979 жылда ачылгъанды, ол заманда Къабарты-Малкъарны ара шахарыны юг-запад району къурала башлагъан эди. Шёндю бу тийреле Нальчикни адамла иги кесек жашагъан жерине саналады. Гимназияда 2000 сабий окъуйду, бу кюнлеге дери эки кезиуге бёлюнюп окъуп тургъандыла, шёндю битеу школчула бир сменнге окъурукъдула.

Бюгюн былайда магъаналы жумуш болгъанды, гимназияны 800 сабий окъурча жангы корпусу ачылгъанды. Ол «Шёндюгюлю школа» федерал проектни чеклеринде Президентибиз Владимир Путинни башламчылыгъы бла жашауда бардырылгъан «Билим бериу» миллет проектни чеклеринде ишленнгенди.

Шёндюгюлю излемлеге келишген мекям 11 минг квадрат метр болады, аны юч блогу барды. Класслары толусунлай окъуу стандартлагъа келишген керекле бла жалчытылыннгандыла. Мында окъурукъ сабийлеге, ишлерик устазлагъа да аламат онгла къуралгъандыла дерге боллукъду.

Битеу коллективге эм окъуучулагъа билим алыуда ашхы кёрюмдюле, жангы жетишимле болдурурларын жюрегими теренинден тежегенме, деп айтылады билдириуде.