Темир энди хайырланып башланнган кезиу

Кёп болмай Басхан районда къырал Эрмитаж бардыргъан Шимал-Кавказны археология экспедициясыны кезиуюнде, бизни эрагъа дери 8-7 ёмюрледе ишленнген – доммакъдан, мияладан адырла, сауутла эм башха затла да табылгъандыла. Къазыу ишлеге сынамлы археологла, тарыхчыла эм студентле да къатышадыла.

 - Бу жол биз «Тёбен Куркужин» археология эсгертмеде ишлейбиз. Бюгюнлюкде экспедицияны кючю бла иги кесек иш бардырылгъанды. Ол санда Къобанны кезиуюнде ишленнген адам асыралгъан жерле табылгъандыла. Алада доммакъдан бла мияладан этилген иги кесек зат сакъланнганды. Тинтиу ишле бардырылсала, кёп сейир зат ачыкъланырыгъына бек ышанабыз, - дейди экспедицияны башчысы Юлия Марченко.

Ол айтханнга кёре, былайда жашагъанланы, адам улу темирни энди хайырлана башлагъан кезиулеге, Шимал-Кавказда биринчи басыннганлагъа санаргъа боллукъду. Ала элле къурап, малчылыкъ, жерчилик бла кюрешгендиле. Жарсыугъа, ала кимле болгъанлары белгисизлей къалады. Аны баш сылтауларындан бири, жазыу кенг хайырланмагъанынданды. 

Эсге сала айтсакъ, Къырал Эрмитажны Шимал-Кавказда археология экспедициясы 2016 жылдан бери ишлейди. Ала 2022 жылгъа дери Огъары Куркужинде къазгъандыла.  Буруннгу жылдан бери Огъары Куркужинде жер кёчген участокда кюрешедиле. 

Эсгертмелеге табийгъатны бла адамны хатасы жетгинчи алимле жетишалгъанлары республиканы тарыхын тинтиуде эм маданият хазнасын сакълауда да ахшы себеплик этерикди.