Ишге сакъатны алгъанны къырал онгдурлукъду

Инсанланы бир-бир къауумларын ишге алгъанлагъа Россей Федерацияны Социал фондуну Къабарты-Малкъарда бёлюмю талай жаны бла себеплик этерге боллукъду. Ведомстводан билдиргенлерине кёре, анга ма была тийишлидиле: предприятияла бла организацияла, энчи предпринимательле, коммерциялы болмагъан эмда сакъатланы битеуроссей жамауат организациялары.

Иш бергенле ол субсидияны, сёз ючюн, СВО-ну ветеранларына, сакъатлагъа, сабийлерин жангыз кеслери ёсдюрген эмда кёп сабийли аналагъа, сора талай башха къауумлагъа кирген инсанлагъа айлыкъларын тёлеуде хайырланыргъа боллукъдула. Аны бла дагъыда сакъат адамлагъа ишчи жерле къурагъанлары ючюн этген къоранчларын жабаргъа жарарыкъды.

Алай бла  субсидия алыр ючюн, инсан Фондха заявление жиберирге керекди. Аны тийишли реестрге саллыкъдыла. Бу жумушну ишге адам алгъандан сора,  эм азындан бир ай озуп, алай 15 декабрьден а кеч къалмай тындырыргъа керекди.

Ахча ючге бёлюнюп берилликди: инсан ишге орналгъандан сора бир, юч эмда алты ай озгъандан сора. Субсидияны бир адам башына ёлчеми 67320 сомду.

Фонд дагъыда 1 эм 2 къауумлу сакъатлагъа, сора аскер къазауатлада сакъат болгъан ветеранлагъа, ишчи жерле къураргъа эмда аланы оборудование бла жалчытыргъа себеплик этеди. Ахча, ол а 200 минг сомгъа жетерге боллукъду, аллай инсан эм азындан 9 ай ишлегенден сора бериледи.

Соруулары болгъанла 8 (8662) 42-09-34 номер бла сёлешсинле неда https://t.me/sfrpokbr телеграм-каналгъа жазсынла. Консультацияла баш кюнден башлап орта кюннге дери, кеси да эрттенликде сагъат тогъуздан ингирде сагъат алтыгъа дери бериледиле, байрым кюн а – ингирде бешге онбеш минут къалгъынчы дери.