Туризм жаны бла магъаналы жолланы жангыртадыла

Арт кезиуде къыралда ич туризм къыстау айный барады. Россейлиледен тышында, тыш къыраллы къонакъла да кёбюсюнде кеси машиналары бла жолоучулукъну сайлайдыла. Аны бла байламлы "Къоркъуусуз эм тынгылы автомобиль жолла" быйылдан башлап " Жашау этерге инфраструктура "  миллет проектни чеклеринде туризм объектлеге баргъан жолла тап эм къоркъуусуз болурча аслам иш этиледи.  

Бу жаны бла Къабарты-Малкъарда магъаналы эм уллу объектледен бирине Экинчи Чегем-Булунгу жолну санаргъа боллукъду. Аны 27 километр кесегинде тынгылы ремонт ишле бардырылгъанлы иги кесек заман болады. Тау жерледе, къыйын табийгъат болумну да алсакъ, борчларын толтурурча подряд организацияны келечилерине иги да къыйналыргъа тюшеди. 

Проектге кёре эки машина бир жолгъа ёталмагъан жерледе жол жети метрге кенгертилгенди. Кече жарытырча чыракъла тартылгъандыла эм жаяу жюрюгенлеге тротуарла, машинала сюелирча, къараучу жерле да жарашдырылгъандыла. Къоркъуусузлукъ жалчытылынырча да бир къауум жумуш тамамланнганды. 

Бюгюнлюкде специалистле Чегем чучхурланы бла Булунгуну эм Эл-Тюбюню арасында жолну 25 километр кесегин игилендирип кюрешедиле. Аны чеклеринде 214 метр тенгли бирде  тогъуз кёпюр жангыртыллыкъды.
 Бусагъатда Чегем сууда кёпюрню аркъауларын салыргъа хазырлана турадыла.   Кёк-Таш сууда да кёпюрню юсюн-башын бояп, къоркъуусузлукъну жалчытхан темир бурууланы салып башлагъандыла. Ызы бла асфальт жаярча мадар этилликди.  Жууунгу эм Чегем суулада кёпюрлени да  мурдорларын  хазырлап кюрешедиле.

Планнга кёре,  кёпюрлени тёртюсюн да  быйыл жайдан кеч къалмай бошаргъа керекдиле. Къалагъан бешисини да юслерине асфальт салынса,  хайырланыргъа берилликдиле.

Саулай алып айтханда, Чегем ауузунда жол толусунлай 2026 жылгъа битерге керекди.