От тюшюуге къажау – энчи низам

Иссилик сакъланнганы эмда жауунла жаумагъанлары ючюн Къабарты-Малкъарны шимал-шаркъ жанында от тюшюуге къоркъуу эм уллу бешинчи къауумгъа жетгенди. Тёрт районда – Урван, Прохладна, Басхан эм Терк – от тюшюуге къажау энчи низам кийирилгенди. Анга кёре бу районлада агъачлада, мюлкледе бла жашау журтлада эмда аланы тийрелеринде от тиргизирге, кир-кипчикни, къургъакъ кырдыкны кюйдюрюрге арталлыда жарамайды. Низамны бузгъанла административ эм уголовный жууапха тартыллыкъдыла.

Жер-жерли самоуправление органлагъа къоркъуусузлукъну жалчытырча къошакъ мадарла этерге, болумну дайым да эсепде тутаргъа буюрулгъанды.

Жорукъланы бузгъанла Административ кодексни 20.4 статьясыны 2-чи кесегине тийишлиликде тазир тёлерикдиле:

- инсанла – 10-20 минг сом;

- къуллукъчула – 30-60 минг сом;

- энчи предпринимательле – 60-80 минг сом;

- юридический лицола – 400-800 минг сом.

Бузукълукъларыны хатасы бла къыйын болум чыкъса неда адам ачыса, уголовный иш ачыллыкъды.

Эсигизге салайыкъ, МЧС от тюшерге къоркъуулу жерлеге дайым къарагъанлай турады.