Предпринимательлени онгдуруугъа аслам ахча бёлюнеди

Шимал Кавказда гитче эмда орта предприятияла, РФ-ни МСП Корпорациясыны болушлугъу бла быйылны биринчи жарымында 5,76 миллиард сом кредит алгъандыла. Озгъан жылны ол кезиую бла тенглешдиргенде, ёсюм алты процент болгъанды, дегендиле КъМР-ни Экономиканы айнытыу министерствосунда.

«Кредит алгъанда къырал берген болушлукъну Шимал-Кавказ регион тири хайырланады. Бу жаны бла тюрлю-тюрлю амалланы юсю бла СКФО-да бизнес 22,3 миллиард сом къоллу болгъанды. Ол санда сагъынылгъан Корпорация берген онглагъа сурам уллуду. Аланы хайырындан предпринимательле ахча мажарадыла, банкла да бизнесге себеплик этедиле», - дегенди Россей Федерацияны Правительствосуну Председателини орунбасары Александр Новак.

Округда бу болушлукъну аслам кесегин Ставрополь край (3,54 миллиард сом) алгъанды. Ызы бла Чечен Республика (0,86), Шимал Осетия (0,54) эмда Къабарты-Малкъар (0,43) барадыла.

Корпорацияны башчысы Александр Исаевич айтханнга кёре: «Шимал Кавказда предпринимательле банкладан алгъан хар тёртюнчю сом ма быллай амал (поручительство) бла берилгендиле. Бу жумуш терк тамамланады, адам анга къатышмайды. Бизнес бла кюрешгенле аны ючюн артыкъ тёлемейдиле, комиссияны банк кеси боюнуна алады. СКФО-гъа бёлюмле жаны бла чеклениу жокъду. Ахчаны асламысында информация эмда связь сфералагъа излегендиле – былтыр бу кезиу бла тенглешдиргенде алада ёсюм алты кереге жетгенди. Дагъыда жарашдырыучу производствола, жумушла тамамлау, транспорт, эл мюлк, саулукъ сакълау, социал, спорт эмда маданият сфералада айнытыу барды».

МСП Корпорация берген поручительство кредитни экиден бирин жабаргъа боллукъду. Аны ёлчеми 1 миллиард сомгъа жетеди, болжалы уа 10 жыл бла чекленеди. Бу программа РФ-ни Президенти Владимир Путинни буйругъу бла 2021 жылда бардырылып башлагъанды.