Жукъу – кесеклени душманы

Америкалы алимле тохташдыргъаннга кёре, жукъуну жетишмегени гриппге къажау дарманны жараусуз этеди.

Биологла уа быллай оюмгъа келгендиле: адам кереклисича бир заманны жатып жукъламаса, ол аны саулугъуна, стрессча, хата салады. Андан сора да, ала былай тергегендиле: иги кесекге тынгылы солумай тургъандан эсе, анда ол кезиуюнде жукълагъандан эсе, антителала эки кереге аз чыгъарыладыла!

Тинтиуле бардыргъан алимледен бири уа былай ангылатады: «Жукъу батарейканы зарядкасы кибикди. Аны себепли, ол инсанны санына-чархына солур ючюн керек болгъандан сора да, кесекледен аурумаз ючюн керекди. Алай эсе да, жарсыугъа, америкалыланы ючден бири жукъудан «тоймайдыла».

Алимле аллай оюмгъа ауругъанланы арасында соруу бардыргъанларындан сора келгендиле. Аланы араларында, дарман салгъанлыкъгъа, кесекле тийгенле кёп заманны (хроникалы халда) жукъламай тургъанладыла. Андан сора да, жукъудан «тоймау» саулукъ бла байламлы башха проблемаланы чыгъарады, сёз ючюн, жюрек бла. Грипп бла бирге уа ол ауруула бютюн къоркъуулу боладыла.

Барысы да биледиле, кесеклени кезиуюнде къолланы жуугъанны неге эм къаллай бирге кереклисин. Жети-сегиз сагъатны ырахат жукълау иммунитетни къалай игилендиргенин а алай кёпле ангыламайдыла».

Иммунитетни кючлер ючюн а, эм магъаналыгъа жаланда жукъуну эм терен кезиую саналады. Саулай жатып солургъа бёлюннген заман бири бирин бир ненча кере алышхан юч кезиуге юлешинеди.

Биринчиси (тынчайгъандан сора 5-10 минутну ичинде жукъу) – алыкъа адамны терк уятып къояргъа боллукъ заман.

Экинчиси – терен болмагъан, женгил жукъу (неда терк кезиу), ол 35-45 минутха созулады.

Ючюнчюсю (неда акъырын кезиу) – ол битеу да жукъугъа бёлюннген заманны, орта эсеп бла алып тергегенде, 45-55 процентин тутады. Бу кезиуде адамны саныны – чархыны къызыулугъу (температурасы) азаяды, жюреги да тынч ишлейди, иммунный системасы уа жангыдан къарыу алгъанча болады, алай бла уа инфекциялагъа къажау турургъа кюч табады.

Аурумаз ючюн къаллай бир жукъларгъа керекди:

Алтыжыллыкъладан башлап онюч жылларына дери сабийлеге – 9-11 сагъат.

Онючжыллыкъладан онсегизжыллыкълагъа дери - 8-19 сагъат.

Онсегиз жылдан абаданлагъа - 7-9 сагъат.