Айырмалылагъа – тийишли саугъала

Бир ненча жылдан бери Окъуучуланы битеуроссей дерс олимпиадаларыны ахыр къырал даражалы неда регион урумларында хорлагъан огъесе призёр болгъан сабийлеге эмда аланы хазырлагъан устазлагъа КъМР-ни Башчысы Казбек Коковну премиялары берилгенлери белгилиди. Бу кюнледе да 2024-2025 окъуу жылда аллай жетишимле болдургъан школчуланы бла аланы окъутханланы сагъынылгъан саугъа бла белгилеуню юсюнден оноугъа къол салыннганды.

Алай бла аллай премиягъа тийишлиле бу жол да аз тюйюлдюле. Ол санда, сёз ючюн, ингилиз тилден, обществознаниядан, географиядан, информатикадан, орус тилден, башха дерследен тюшюндюрген устазла 50-ден асламдыла. Аланы санында уа Окъуучуланы битеуроссей дерс олимпиадаларында ахыр къырал даражалы урумну призёрларын хазырлагъанла - «Кюн шахар» сабий чыгъармачылыкъ академияны хунерлилеге лицейинде географиядан окъутхан Акъайланы Ахмат Русланович бла Нальчикни 2-чи номерли лицейини экономикадан устазы Холаланы Джамиля Маратовна-бардыла.

Сагъынылгъан олимпиаданы регионда бардырылгъан кезиуюнде ол неда бу дерсден хорлагъан сабийлени хазырлагъанланы тизмеси да кёллендиреди. Сёз ючюн, «Кюн шахар» сабий чыгъармачылыкъ академияны хунерлилеге лицейинде математикадан дерсле берген Айшаланы Кязим Мухадинович бла географиядан  окъутхан  Акъайланы Ахмат Русланович, 2-чи номерли лицейде экономикадан тюшюндюрген Холаланы Джамиля Маратовна ол тизмеде болгъанлары да къууандырады. Эслегенигизча,  республика даражада хорлагъан сабийлени хазырлагъанланы окъуучулары ахыр урумда да жетишимли болгъандыла  эмда аны себебинден аллай устазла эки тизмеге да тюшгендиле.

Алай бла олимпиаданы регион урумунда хорлагъан окъуучуланы араларында  Бёзюланы Амина (орус тил),  Жангоразланы Нюржан (экология), Къулбайланы Алий (география),  Мирзоланы Самира (орус литература), Саубарланы Алина (физкультура) да бардыла

Белгилисича, андан тышында да, талай жыл мындан алгъа регионну оноучусу къарачай-малкъар эмда къабарты-черкес тилледен бла адабиятладан мектеплени окъуучуларыны арасында республика даражада бардырылгъан олимпиадада хорлагъан сабийлени бла аланы хазырлагъанланы да КъМР-ни Башчысыны премиясы бла белгилеуню къабыл кёргенди. Алай бла 2024-2025 окъуу жылда аллай саугъагъа устазла Батырбийланы Мадина Хабибулаховна (Биринчи Чегем, 3-чю номерли мектеп), Чочайланы Нажабат  Хызыровна (Бызынгыны орта школу) бла Гузеланы Асият Орусбиевна  (Биринчи Чегем, 1-чи номерли мектеп) да тийишли болгъандыла.

Аллай премия бла белгиленнген окъуучуланы санында уа Габоланы Алина,  Сарбашланы Саида, Гайыланы Алина да бардыла.