Саугъала, сертификатла да

Бу кюнледе  «Корона Терскола» деген ат бла  Минги тауну тийресинде бардырылгъан  фестиваль бошалгъанды. Аны  биринчи кесегини юсюнден газетде материал басмаланнганды.  Ахыр кесеги да Терс-Къолда бардырылып  бошалгъанды.

Эсге салайыкъ, скайраннинг спортну жорукъларына кёре, фестивальны ахыр кюнюн  программасыны чеклеринде эришиулеге къатышханла таулагъа терк атлап, чабып да чыгъаргъа керек эдиле. Бу жол ала эришиулерин  Терс-Къол элден башлагъандыла. Спортсменле Чегетге 2.800 метрге, Терс- Къолда 3.450 эмда  Ит-Къолда 2.300 метр бийикликге чыгъаргъа керек эдиле. Биринчи кюнледе да скайраннингде  спортну бу тюрлюсюн сюйгенлени араларында  Къабарты-Малкъарны чемпионаты бардырылгъанды.

Юч чабыуну да эсеплерине кёре, тиширыуланы араларында  Татьяна Шуртаева, эр кишилени араларында уа Алексей Пагнуев биринчиле болгъандыла. Татьяна  ёрге юч сагъат  он минут, алты секундха, Алексей да эки сагъат, тёрт минут, элли эки секундха чыкъгъандыла.

Битеу юч чабыуда да Къабарты-Малкъарда альпинизмден федерацияны председатели, сыйлы къутхарыучу, эки кере Эверестге чыкъгъан  Ёлмезланы Абдулхалим  а эм биринчи болгъанды.

Хорлагъанлагъа эм экинчи, ючюнчю жерлеге  тийишли  болгъанлагъа  саугъала, сертификатла да  берилгендиле. Сыйлы жерле алмай, алай, эришиулеге  къатышып,  таугъа чыкъгъанла уа  сертификатла къоллу болгъандыла. Саугъаланы  ВАSК компания, сертификатланы уа КъМР-ни альпинизмден федерациясы бергенди.

«Бизни бу  таулагъа чабып чыгъыуубузну юсюнден  ол ойнау халда бардырылгъан фестивальды деп  айтырча тюйюлдю. Аслам эсни  спорт  дистанциягъа  бёлюрге, бирге  баргъанда шуёхлукъ билекликге, къоркъуусузлукъгъа, дагъыда алагъа ушаш затлагъа эс бурабыз»,- дегенди  фестивалны къурагъанладан бири Виталий Шкель.

«Мен «Корона Терс-Къола» фестивальны  анда болум бла байламлы бек жаратханма.Таурухлу, сейирлик ариу таула, жаяу жолла. Алагъа  кесим бараллыкъ тюйюл эдим. Кюн да бизни ючюн тийгенча эди. Кертиди, эришиуню биринчи кюнюнде бир кесек  жауун да жаугъанды, анга да къарамай, стартха  чыкъгъанла бири да  жолдан кетмегендиле. Битеу ол затла фестивальны унутулмазча этгендиле. Хар чабыуда  анга къатышханла кеслерин  хорларгъа,  кючлерине ийнаныргъа кюреше эдиле»,- деп билдиргенди эришиулени, ёрлеуню юсюнден да оюмун Москвадан келген  Палина Федоткина. Ол кеси да жетер жерге дери тохтаусуз  баргъанлдадан бири болгъанды.

 -Сёзсюз, къыйын эди, алай Минги тауну сыфаты эмда  бу чабыу  ол къыйынлыкъланы унутдура эдиле. Ит къол да – сейирлик тауду: алыкъа адам аягъы басмагъан жерлени суратлары, туристледен толу жаяу жолла эмда бир бири ызындан барыуну техникасын, жорукъларын  сакъларгъа  керекли жолланы, бары да  аламат кёрюне эдиле кёзге,- дейди фестивальгъа къатышхан Василий Зорин.

«Тик бийикге  чабып, терк атлау бла да чыгъыуну юч  кезиую да аламат эдиле. Эришиулеге къатышханланы орта эсеп бла  жыл санлары иги да бийикди деп айтыргъа боллукъду. Аланы асламысы  ёрге бир сагъатха жууукъ заманнга жетедиле, ол а бизни, жаш адамланы,  бютюн бек кёллендире эди»,- дегенди таугъа чыкъгъан «TrailLad» компанияны  къурагъанладан бири Дмитрий  Желнов.

Быйыл  фестивальны программасында биринчи кере дагъыда skу -race  чабыу да бардырылгъанды, аны жорукъларына кёре  эришиулеге къатышханла бир бири ызындан  юч таугъа чабып  чыгъаргъа керек эдиле. Чабыу классикалы  скайраннингде альпинизмни  тюрлюлери бла байламлыды. Спортсменле  жолну бек къоркъуулу жерин ётедиле. Аны ючюн ала альпинистлени энчи бёрклерин башларына киерге, беллерине къысхан кереклени, «мыйыкъланы» да биргелерине алыргъа  керек болгъандыла. Битеу ол затла  къоркъуусузлукъну сакълау бла байламлы  эдиле.

Отузкилометрлик жол эмда битеу да  3.500 метр бийиклик анга къатышхан хар бирини да жюрегин бийлегенди. Чабыу ол аламат ариу  жерде - курорт элде  болгъаны да аламат эди, дегендиле анга къатышханла.

«Скайраннингни дуниясында шёндюгю скайраннинг болгъаны къалай аламатды! Быллай спорт чабыуну къурагъанланы барына да жюрек ыразылыгъымы билдиреме, керти да аламат жомакълы жер, ариу адамла,  сейирлик Минги тау, Чегет, Терс-Къол! Байрам да алай болур деп, эсимде да жокъ эди. Мында хар ким да бир бирни  ангылайды, стартха нек чыкъгъанын биледи. Бу жол бери келиуюм жашагъан ёмюрюмде  эсимде къаллыкъды!»-  дегенди   чабыуда хорлам болдургъан Валерия Меркулова.

«Кёп чабыуллагъа къатышханма, ол санда  Европада бардырылгъанлагъа да. Мен оюм этгенден,  бу  Россейде бек  кючлю чабыуду эмда  дунияда бардырылгъанларына келишеди!»- дегенди эришиулеге къатышхан Сергей Сурмонин да.