Къолайсыз юйюрлеге эс тапдырыр муратда

Сабийлени бла жаш тёлюню  «Биринчилени атламлары» битеуроссей биригиулерини регион бёлюмю  «Круговорот добра» деген  жандауурлукъ акциягъа къатышады.

Бу огъурлу иш   къыйын жашау болумгъа тюшген сабийлеге школгъа хазырларгъа  болушур мурат бла башланнганды. Анга  къатышыргъа  угъай демегенле школгъа барлыкъ къызчыкълагъа бла жашчыкълагъа дефтерле, къаламла, карандашла, ластикле, пеналла, сурат ишлерге альбомла, бояула, пластилин, кисточкала, школ рюкзакла, дагъыда башха окъуу  керекле алып берирге боллукъдула. Аланы уа  Нальчикде  Къулийланы Къайсын атлы проспектде 12-чи номерли юйню экинчи къатысында 10-чу  кабинетге келтирирге тийишлиди.

-Бу жандауурлукъ акциябызгъа  биринчиле болуп «Твоя книга» тюкенни келечилери  къошулгъандыла, ала  ёз ырысхыларындан кёп затла  келтиргендиле. Аны  ючюн алагъа жюрек ыразылыгъыбызны билдиребиз,- дегенди  «Биринчилени атламлары»  биригиуню регион бёлюмюню таматасы Аслан Шипшев.

Ол билдлиргенича, акция 3 августха дери бардырыллыкъды. «Анга къатышханланы болушлукълары къыйын болумгъа тюшген хар сабийге жетдирилмей къаллыкъ тюйюлдю»,- деп къошханды Аслан Шипшев.