Бахчаланы буздан къорууларча

Кёп болмай  Лескен  районну Хатуей элинде терек бахчаланы бла эл мюлкге бёлюннген жерлени буздан къорууларча энчи комплекс салыннганды, деп билдириледи КъМР-ни Эл мюлк министерствосуну пресс-службасындан.

Республиканы Башчысыны Казбек Коковну  оноуу бла 2020 жылдан бери
Бахсан, Зольск, Черек эм  Лескен районлада 38 энчи пункт  ишлейди.  Ала  бла  къорууланнган жерле 481,4  минг гектаргъа жетедиле. Болсада  эл мюлк жерледен тышында,   социал магъаналы объектлени, жашау  журтланы эм  башха жерлени да буздан сакъларча мадар этилгенди.

Быйыл эл мюлк жерлени буз уруудан къорууларча мадарлагъа Къабарты-Малкъарны бюджетинден 40 миллион сом бёлюнюрюкдю. Ол толусунлай  былтыргъы кёрюмдюге келишеди. Бюгюнлюкде  тийишли ишлени бардырыр муратда КъМР-ни Эл мюлк министерствосу  Шимал-Кавказ аскер  служба бла келишим этгенди.

Белгилисича, Къабарты-Малкъар, буз уруп халеклик салыргъа къоркъуу уллу болгъан регионладан бирине  саналады. Болсада энди жангы мадарланы хайыры бла эл мюлк жерлени  табийгъатны кючюнден сакъларгъа  онг табыллыкъды.

Республикада буз урургъа къоркъуулу заманнга жаз башы бла жай саналадыла. Ол себепден,  биринчи апрельден башлап, пунктланы  барысында да дежурство бардырылады.

Аны бла байламлы бу кюнледе окъуна  Шимал-Кавказ аскер служба керекли затланы хазырлыкъгъа келтиргенди.