Айтхылыкъ гёжефледен – жараула

Россейли кикбоксингде бла боксда айтхылыкъ гёжефле республикабызны жаш спортчулары бла жараула бардыргъандыла.

Нальчикге Ставрополь крайдан Россейни он кере чемпиону дунияны кубогуну иеси Европаны чемпионатыны призёру Виктория Усаченко бла боксдан Европаны чемпиону спортну халкъла аралы устасы Светлана Косова келгендиле. Ала Къабарты-Малкъарны кикбоксингден федерациясыны башчысы Къудайланы Алим, Урунуу эм социал къорууланыу министерствону Адамланы социал жумушларын жалчытыу битеулю республикалы арасында сабийле бла тюбешгендиле.

Къонакъла спорт жолларыны юсюнден сейир хапарла айтхандыла, соруулагъа жууапла бергендиле, артда уа гитчелени саугъала бла да къууандыргъандыла. Ызы бла Нальчикни кикбоксингден арасында жараула да ётдюргендиле, атлары айтылгъан гёжефле бла юйрениулеге къатыш единоборствола, бокс, ушу бла кюрешгенле да – битеу да 150 адам, ол санда уа чекленнген онглары болгъан сабийле да – жыйылгъандыла.  Ахырында жаш спортчула къонакъла эмда Олимпиаданы жау чырагъы бла суратлагъа тюшгендиле.         

 Спортну ветеранлары быллай тюбешиулени ёсе келген тёлюлени саулукълу жашау бардырыргъа кёллендирир, аланы Ата журтха сюймекликлерин кючлендирир, себеплик керек болгъанлагъа болушур муратда дайым къурайдыла.

 

Кульчаланы Зульфия.
Поделиться: