Къырал аманат жерлеге хакъ тёлемей барыргъа боллукъла

Къабарты-Малкъарны Бийик тау заповеднигине баргъаны ючюн тёлеуден кёпле эркин этиледиле. Тийишли тизмеге кимле тюшгенлерин ол учрежденияны башчысыны экологиядан жарыкъландырыу эмда туризм жаны бла орунбасары Тогъузаланы Лейла билдиргенди:

- Урушну сакъатлары;

- Уллу Ата журт урушха къатышханла;

- Совет Союзну Жигити, Россей Федерацияны Жигити атлагъа тийишли болгъанла, Махтаулукъ орденни толу кавалерлери;

- Социалист Урунууну Жигитлери, Россей Федерацияны Урунууну Жигитлери, Урунуу Махтау орденни юч даражасына тийишли болгъанла;

- «Ветеранланы юсюнден» федерал законну 3 статьясыны 1 пунктунда кёргюзтюлген, кеслери да аскер къазауатлагъа къатышхан ветеранла;

- 1941 жылда 22 июньдан башлап  1945 жылда 3 сентябрьге дери кезиуде эм азындан алты айны аскерде угъай, андан тышында аскер бёлюмледе, учреждениялада эмда аскер-окъуу жерледе къуллукъ этгенле, аны ючюн СССР-ни орденлери неда майдаллары бла саугъаланнганла;

- «Блокада Ленинградда жашагъан» белги бла саугъаланнган инсанла;

- Уллу Ата журт урушну кезиуюнде кёкден келген къоркъууладан къутхаргъан объектледе уруннганла, тылда къоруулау мекямланы, аскер-тенгиз базаланы, аэродромланы эмда башха аскер мекямланы къурулушларына къатышханла;

- Уллу Ата журт урушха эмда аскер къазауатлагъа къатышып сакъат болуп, артда ауушханланы юйдегилери, аскер къазауатлагъа къатышханланы юйдегилери, Ленинградда больницалада бла госпитальлада ишлеп, артда ауушханланы юйдегилери;

- Сакъатла эмда ала бла бирге келгенле;

- Сакъат сабийле эмда ала бла бирге келгенле;

- Чернобыльде АЭС-де авариядан сора эмда Семипалатинскде ядерный сынауладан сора радиацияны хатасын сынагъанла;

- Жыл санлары школну тауусхан чекге жетмеген сабийле;

- Къолайсыз юйюрле, жангыз кеслери жашагъан къолайсыз инсанла, «Къырал социал болушлукъну юсюнден» федерал закон бла белгиленнген башха къауумла;

- Пенсиячыла (Россей Федерацияны инсанлары);

- Кёп (акъылбалыкъ болмагъан) сабийлери болгъан ата-анала;

- Ёксюз, ата-анасыз къалгъан сабийле;

- Энчи аскер операциягъа къатышханла эмда аланы юйдегилери;

- Социал жаны бла къорууланмагъан къауумлагъа (пенсиячыла, ветеранла, саулукъларында чекленнген онглары болгъанла, кёп сабийли юйюрле) кирген, кеслери да экология-жарыкъландырыу жумушлагъа къатышхан инсанла;

- Туризм организацияланы келечилери, туристле бла бирге келгенле (бир къауумгъа биринден кёп угъай);

- Сабийле эмда акъылбалыкъ болмагъанла бла бирге экология туризм жумушланы тамамлагъан кезиуде келген педагогла;

- Заповедникни тийресинде экология-жарыкъландырыу жумушлагъа къатышханланы ташыгъан улоуланы жюрютгенле;

- Заповедник бла келишиулюкде бардырылгъан волонтёр жумушлагъа къатышханла;

- «Заповедное путешествие - премиум» сертификатлары болгъанла.