Бизнес бла кюрешгенлеге - бютюн женгил онгла

МСП.РФ цифралы платформаны хайырланыучула быйылны ал жарымында регионлада бизнесге себеплик этиу амалланы излеп 35,5 минг  тилек бергендиле. Аланы асламысында маркетинг жумушлагъа, аз ёлчемли кредитлеге, билимге эмда консультациялагъа сейирлери бар эди, дегендиле КъМР-ни Экономиканы айнытыу министерствосунда.

«Бу платформа предпринимательлеге регионлада 800 чакълы себеплик этиуню   амалына  жол ачады. Ала бизнесни башлау  эмда бардырыу жаны бла информацияны эмда жумушланы онлайн-халда терк аладыла. Тилеклени  тёртден бири  уа микрофинансла бла байламлыдыла. Регион властьла бла бирге биз кёбюрек  изленнген жумушланы тамамлаугъа бир кёзден къаралырча, тилекни бериуден башлап  къол салыугъа дери хар неда «цифрада» болурча этгенбиз. Къыралны хар субъектини да бу платформада энчи бёлюмю барды; гитче эмда орта предпринимательликни  онгдуруу жаны бла бар жумушларын ала анда тындырадыла», - дегенди МСП Корпорацияны башчысы Александр Исаевич.

Къабарты-Малкъарда быйылны ал жарымында бу платформа бла 67 тилек  берилгенди. Озгъан жылны тийишли кезиую бла тенглешдиргенде, аланы саны 46 процентге аслам болгъанды. Хайырланыучуланы кёбюсюнде микрофинанс жумушлагъа, консультациялагъа сейирлери бар эди.