Муратындан таймагъан хорламлы болурГёжеф Гюлюйланы Тамерлан ауур атлетикада жетишимлери бла белгилиди Ол Элбрус районну олимпиада резервли спорт школунда ауур атлетика жаны бла жарау этгенди, спортну устасыды, кёп даражалы эришиуледе хорлагъанды, Россейни жыйымдыкъ къауумуна киреди. Гюлюй улу республикада биринчи кере бардырылгъан «Къабарты-Малкъарны ёхтемлиги» деген эришиуде да атын айтдыргъанды. Эришиуню мураты регионну бла къыралны айныууна себеплик этген жаш адамланы ачыкълау эм хурметлеу болгъанды. Эришиу он бёлюмде ётдюрюлгенди, анга 18-35-жыллыкъ адамла къатышхандыла, аланы араларында ишлеринде устала, предпринимательле, алимле, волонтёрла, спортчула да бар эдиле. Хорлагъанны уа интернетде къол кётюрюуню юсю бла сайлагъандыла. Тамерлан «Жылны спортчусу» (спортда болдургъан жетишимлери ючюн) бёлюмде хорлагъанды. Гёжефни тренери Муаед Шаов билдиргеннге кёре, Тамерлан ауур атлетика бла тогъуз жылында кюрешип башлагъанды. Гитчеликден да муратына жетиуде къатылыгъы, итиниулюгю бла айырмалы болгъанды, ол ышанларыны хайырындан хорлап да терк башлагъанды. Бир жылны къыстау жарау этгенинден сора биринчи эришиую – Къабарты-Малкъарны биринчилигине – атланнганды, анда биринчи жерни да алгъанды. Аны ызындан юч жылда да республикада ётдюрюлген битеу эришиуледе алчылыкъны ычхындырмагъанды. 2018 жылда Гюлюй улу Владимирде Россейни 17 жыллары толмагъан гёжефлени араларында биринчилигине къатышханды, кесине уа ол кезиуде 14 жылы толуп. Жашлыгъына, быллай даражалы эришиуге биринчи кере баргъанына къарамай, Тамерлан спортну устасына кандидатны мардасындан уллу ауурлукъну кётюргенди, бешинчи жерге да чыкъгъанды. Бир жылдан а къырал биринчиликден «кюмюшню» келтиргенди. Дагъыда бир жылдан а спортну устасына марданы да толтургъанды. 2021 жылда юч уллу эришиуге къатышханды эм барысында да жетишгенди. Алгъа Россейни биринчилигинде хорлагъанды, ызы бла Европаны биринчилигинде ючюнчю болгъанды, дунияны биринчилигинде да бешинчи жерни алгъанды, эришиуню даражасын эм спортчуну жыл санын эсге алсакъ, ол да бийик кёрюмдюдю. Андан сора къыралны юниор биринчиликлеринде эки кере «алтынны» къытханды, спартакиадада, башха турнирледе да саугъа жерлеге чыкъгъанды. Былтыр, саулугъуна чып тюшюп, ауукъ заманны жарау этмей тургъанды. Бир кесекден а, жангыдан кюч алып, къырал даражада биягъы хорлагъанды. Ара шахарны олимпиада резервли училищесине киргенден сора Тамерлан эришиулеге Къабарты-Малкъарны эм Москваны атындан къатышып тебирегенди. Училищени тауусханлай а, умутландыргъан атлет Физкультураны россейли къырал университетине киргенди.
Поделиться:
Читать также:
13.11.2026 - 15:10 →
Нальчикчиле – «Шахарланы сермешлеринде»
13.11.2026 - 15:10 →
Барысын да озгъандыла
11.11.2026 - 14:03 →
Жараулагъа, саулукъну кючлерге да - ахшы онгла
09.11.2026 - 13:13 →
Уллу эришиулюкде тюшген майдалла
09.11.2026 - 13:13 →
Кёп жаны бла сынагъандыла кеслерин
| ||



