Бюджет жерле асламдыла

Къабарты-Малкъар къырал университетде абитуриентлени окъуугъа алыу барады. Быйыл анда 1600-ден аслам студентге бюджет жер боллукъду.

Бийик усталыкъ билим алыргъа 1178 бюджет жер барды, орта усталыкъ билим алыргъа бу халда 461 жер берилгенди. Жаш адамла жорукълада айтылгъан къагъытланы барысын да жыйышдырып келтирирге керекдиле. Араларында жетишмегени бар эсе, волонтёрла болушадыла, не этерге кереклисин ангылатадыла. Волонтёр къауумну келечиси Ангелина Барагунова билдиргеннге кёре, ала асламысында ИНН-ни, врачдан къагъытны унутадыла. Ызы бла абитуриент, сайлагъан усталыгъына кёре консультант бла ушакъ этеди. Университетде 9 институт, медицина академия, 4 колледж бардыла, юйретиу программала 300-ден асламдыла.

Быйылны жангычылыкъларындан бири – клиника психологиядан бёлюмге бюджет жерле берилгенлериндеди. Анга кирирге сюйгенле асламдыла. Вузну абитуриентле бла ишлеу жаны бла бёлюмюню башчысы Альбина Виндижева билдиргеннге кёре, медицинаны сайлагъанла асламдыла, мында 63 бюджет жерден 43-сю целевой халда келгенлеге бериледи. Энчи эс устазланы хазырлаугъа бёлюнеди, мектепледе ала жетишмейдиле. Инеженер-техника жаны бла бюджетге кирирча, келишим бла да окъурча жерле да кёпдюле.

Бюджет жерлени 20 проценти льготалары болгъанлагъадыла. Абитуриентлеге таплыкъгъа аттестатны копиясын келтирирге жарайды, аны хайыры бла къагъытларын бир ненча жерге бергенлеге вузланы араларында айланыргъа тюшмейди. Вузну кесинде сынаула ётерге тийишли усталыкъланы сайлагъанла документлерин 15 июльгъа дери келтирирге керекдиле, бир къырал экзаменни эсеплерине кёре киргенлеге уа – 25 июльгъа дери.