Хар жаны бла да себеплик этилликди

Бу кюнледе Къабарты-Малкъар гуманитар-техника колледжде  «тёгерек стол» болгъанды. Анда сёз санларында къыяулары болгъан, инвалид жаш адамланы  иш бла жалчытыуну эмда усталыкъ алырча онгла къурауну юсюнден баргъанды.

Жыйылыуда  бир бирге сынауларындан юлюш этиуде, социал жаны бла айнытыуда эмда инвалид адамлагъа  усталыкъ алыуда тюбеген чырмауланы кетериуде магъаналы ишле сюзюлгендиле.

Тёгерек столну чеклеринде  «Республикада иш бла жалчытыу эмда  адамланы социал къоруулау жаны бла арада» ишлеген специалистле  «Россейде иш» деген ат бла  порталда  электрон сервислени къалай хайырланыргъа боллугъуну юсюнден  мастер-классла бардыргъандыла. Дагъыда бу ишге къатышхан жаш иш излеучюлеге  деп  онлайн-амалланы,  пособияланы  эмда консультацияланы алырча онгланы юсюнден да айтхандыла. Битеу ол затла иш излеген инвалидле жюреклери  жаратхан, эте билген, сюйген ишлерин табаргъа болушурча этилген мадарладыла.

Тюбешиуню ахырында уа  дагъыда сёз колледжни бошап чыкъгъанланы ишге тохташдырыуну юсюнден да баргъанды. Анга къатышханла  билим берген учрежденияла, иш бериучюле эмда  инвалидле   Республикадагъы  иш бла жалчытыу, социал къоруулау ара  биригип ишлеселе иги боллугъун да чертгендиле. Битеу сюзюлген, кётюрюлген  вопросла эсге алыннгандыла эмда саусуз жаш адамлагъа таплыкъгъа тамамланыллыкълары айтылгъанды. Инвалид сабийлери болгъан ата-аналагъа болушлукъ этген Битеуроссей регион жамауат организацияны председатели Бёзюланы Марина уа кётюрюлген  вопросла жаны бла себеплик этилмей къалмазлыгъына ышандыргъанды.