Аскерчиле толтургъан борчларыны юсюнден хапарлагъандыла

Россей Федерацияны Президентини Шимал-Кавказ федерал округда толу эркинликли келечиси Юрий Чайка СКФО-ну регионларыны Башчылары бла бирге «Терекни» аскерчилери бла тюбешиу къурагъанды, ала къазауат баргъан тийреледен къайтхандыла.

Жашла энчи аскер операцияны чеклеринде толтургъан борчларыны, подразделенияланы аскер жолларыны эмда аланы къуралыуларыны юсюнден хапарлагъандыла.

Юрий Чайка «Терекни» аскер байракъ алгъанлары бла энтта бир алгъышлагъанды, бригаданы айныу ызларыны юсюнден оюмун билдиргенди, сора аскерчилени жалчытыуда болушлукъ этген меценатлагъа да ыразылыгъын айтханды.

Тюбешиуге дагъыда Юг аскер округну аскерлерини командующийини къуллугъун болжаллы халда толтургъан Владимир Кочетков, РФ-ни миллет гвардиясыны Шимал-Кавказ округуну Жуков орденли аскерлерини командующийи Владимир Спиридонов, РФ-де МВД-ни Шимал-Кавказ федерал округда Баш управлениясыны таматасыны орунбасары Николай Букин, андан сора да Дагъыстан Республиканы Правительствосуну Председателини орунбасары Рамазан Джафаров, Чечен Республиканы Башчысыны болушлукъчусу – ЧР-ни миллет политика, тыш байламлыкъла, басма эмда информация министри Ахмед Дудаев, Пятигорский эм Черкесский архиепископ Феофилакт, Ставрополь крайны муслийманларыны дин управлениясыны муфтийи Мухаммад Рахимов эмда Дагъыстан Республиканы муслийманларыны дин управлениясыны муфтийи Ахмад Абдулаев къатышхандыла.