Социал вклад эмда счёт ачаргъа женгил амал

Госуслуги къырал порталда энди социал вклад эмда социал счёт ачаргъа жарайды. Бу амалны льготалагъа тийишли, кеслери да социал тёлеуле алгъан, программагъа къатышхан банкланы клиентлери болгъан къауумла хайырланыргъа боллукъдула. Финанс учрежденияла да бу сервисге тири къошуладыла, дегендиле Къабарты-Малкъарда МФЦ-да.

Ким ачаллыкъды вкладны неда счётну?

Россейни жыл санлары 18-ге жетген инсанлары, кеслери да бу социал болушлукъну бирин окъуна алгъанла:

- сабийлеге эмда ауурлукълары болгъан тиширыулагъа берилген пособияны;

- социал келишим бла айлыкъ эмда бир кезиулюк пособияны;

- пенсияларыны юсюне регион неда къырал къошакъ тёлеуню.

Излемле къаллайдыла?

Вкладны ёлчеми – 50 минг сомгъа дериди. Аны не заманда да толтурургъа жарайды, алай ол мардадан озмай.

Болжалы бир жылды, аны ызы бла энтта да созаргъа жарайды.

Процент ставкасы банкда болгъан ставкаланы арасында эм бийигиди.

Процентле ай сайын тёленедиле.

Социал счётда уа?

Анда тутхан ахчагъа марда салынмайды. Счётну къачан сюйсегиз да, неллай бирге сюйсегиз да, толтурургъа жарайды.

Болжалы бир жылды, ызы бла андан ары созаргъа боллукъду.

Процент ставкасы келишим бла тохташдырылады. Счётда 50 минг сомдан аз бар эсе, анга къошуллукъ процент Россейни Банкыны ключевой ставкасыны экиден биринден аз боллукъ тюйюлдю. Ол кеси да ай сайын тёленеди.

Ахчаны къачан эмда къаллай бирин сюйсегиз да тешерге жарайды. Башхалагъа уа бир айгъа 20 минг сомну кёчюрюрге боллукъду комиссия тёлемей.

Бу магъаналыды: келишимни Госуслуги порталгъа кирип, жаланда кесигиз эталлыкъсыз. Биреу телефон бла сёлешип, бу жумушну юсю бла сизге болушургъа дей эсе, анга ийнанмагъыз – ол хыйлачыды.