Электрокюч бла жалчытыу ышаннгылы болурча

«Россети Шимал Кавказ» компанияны Къабарты-Малкъарда бёлюмюню – «Каббалкэнергону» специалистлери 240 минг чакълы хайырланыучуну эмда жюзден артыкъ социал магъаналы объектни бла учрежденияны электрокюч бла жалчытыу ышаннгылы болурча мадар этгендиле.

Компаниядан билдиргенлерине кёре, аны Нальчикде электросеть бёлюмюню ишчи къауумлары быйыл сегиз километр чакълы бийик вольтлу (0,4-10 кВ) ток ызланы жангыртхандыла, 45 чыпын орнатхандыла, аллай эски болгъан бир ненчасын (56) алышхандыла, электрокючню тыйгъан жарым жюз чакълы эски устройствону тешип, орунларына шёндюгю тюрлюлерин орнатхандыла.

Андан сора да, специалистле 7,4 километр эски чыбыкъланы жангы, пластмасс бла тышланнган (СИП) аллайгъа алышхандыла. Ол да ток ызланы ышаннгылы, хауа болумлагъа чыдамлы тюрлюсюдю. Энергетикле дагъыда 66 трансформатор подстанциягъа, 26 трансформаторгъа, 8 километрден артыкъ кабель чыбыкълагъа ремонт этгендиле.

Электрокюч ызла, ала бла бирге уа ток бла жалчытыу да ышаннгылы болур ючюн, экинчилери созулгъан тийреледе терекле неда юлкюле ёсмезге керекдиле. Компанияда анга не заманда да эс бурулады эмда мадар этиледи. Быйыл да тийишли бригадала битеу да 0,31 гектарны тазалагъандыла, жетмиш терекни артыкъ ёсген бутакъларын кесгендиле.