Мюлкге шагъатлыкъ къагъытны къалай алыргъа боллукъду?

Роскадастрны республиканы бёлюмюнде энчи аскер операциягъа къатышхан баш иеси ючюн тиширыу мюлкню юсюнден шартланы  къалай алыргъа боллугъун ангылатхандыла. 

Инсанны аны иелигинде болгъан тепдирилмеген мюлкню юсюнден шартла жашырынлыкъда турадыла, ала хар сюйгеннге берилип къалмайдыла. Шагъатлыкъ къагъыт аны законлу келечисине, право низамны сакълаучу органлагъа, сюдлеге эм «Тепдирилмеген мюлкню къырал эсепге салыуну юсюнден» федерал законда белгиленнген инсанлагъа берилирге боллукъду. Роскадастрны филиалыны бёлюмюню башчысы Созайланы Сабина ангылатханыча, законнга тийишлиликде, юйдегиле быллай къагъытланы алыргъа эркинликлери болгъан инсанланы къауумларына кирмейдиле. Анга кёре, эр неда юй бийче бир бирлерини иеликлеринде болгъан мюлкню юсюнден выпискаланы алыр ючюн аланы атларына жазылгъан ышаныулукъ къагъытны келтирирге керекдиле.

Ышаныулукъ къагъыт бир инсан башхагъа аны мюлкю бла байламлы сейирлерин кёргюзтюрге эмда юридический жумушланы тамамларгъа эркинлик бергенини шагъатыды. Ол нотариусда толтурулады, алай энчиликле да бардыла. Юлгюге, аскер бёлюмледе къуллукъ этгенлени, аскерчи усталыкъ билим берген учреждениялада окъуй тургъанланы орунларына ышаныулукъ къагъытха къол аланы командирлери, бёлюмлени, окъуу юйлени башчылары салаллыкъдыла. Аскерчи госпитальда, санаторийде неда башха аскер-багъыу учрежденияда эсе, къол ол жерни башчысы неда аны медицина жаны бла орунбасары, баш неда дежурный врач салыргъа боллукъдула, дейди бёлюмню юрисконсультанты Владислав Озермегов.

Быйылдан башлап Уллу Ата журт урушну ветеранлары эмда андан сакъат болуп къайтханла, аскерчи къазауатлагъа къатышханла, сакъат сабийле, сабийликден биринчи эм экинчи къауумда сакъатла, акъылбалыкъ болмагъан юч эм андан кёп сабийле ёсдюргенле къырал тазирни 50 процентин тёлейдиле. Учуз багъа бла тазир аланы иеликлеринде болгъан мюлкню юсюнден соргъанда тёленирикди. Алай инсан льготалагъа тийишли болгъанына шагъатлыкъ къагъыт изленирикди.