Къойчулукъну айнытыугъа алланып

Бизни къыралда къойчулукъгъа бегирек да Шимал Кавказда магъана берилгени себепли къой этни ючден бирин бу округда чыгъаргъанлары да сейир тюйюлдю. Озгъан жыл бла тенглешдиргенде, быйыл СКФО-да ол энтта да 11,5 процент къошханды, деп айтылады КъМР-ни Эл мюлк министерствосуну билдириуюнде.

Россельхозбанкны тергеулерине кёре, быйыл ал юч айны ичинде округда 22,1 минг тонна къой эт чыгъарылгъанды. Анга эм уллу къошумчулукъну Дагъыстан (6,3), Къарачай-Черкес Республика (5,2) эм Ставрополь край (4,7) этгендиле. Къабарты-Малкъар а 2,7 минг тонна бла тёртюнчю жердеди.

Сагъынылгъан кёрюмдюден тогъуз минг тоннаны - элчиле, иели мюлкле – 8,4, эл мюлк организацияла уа – 4,7 минг тоннаны жалчытхандыла.

Былтыр саулай къыралны къой эт бла 90 проценти бла иели мюлкле эмда элчи мюлкле жалчытхандыла. Кесини да ючден экисин Шимал Кавказ эмда Къыбыла федерал округладан. Алада къойчулукъ бла кюреширге хауалары, жерлери да игиди. Ал юч регион а ма быладыла: Дагъыстан (75,1 минг тонна сау ауурлукъда), Къалмукъ Республика (42 минг тонна) эм Астрахань область (33,2 минг тонна).

«Бизни къыралда эт къойчулукъну айнытыу эмда жангыртыу жаны бла иги онгла бардыла. Бёлюмню мурдорун эмда производстволу инфраструктураны къурауда, шёндюгю технологияланы сингдириуде Шимал Кавказ алчыды. Эсеплеге кёре, быйыл Россейде, бир адам башына алып тергегенде, 1,4 килограмм къой эт хайырланыллыкъды. Аны ючюн бёлюм жетишимли болурча, ишни къыйматлылыгъын кётюрюрге, качествогъа сакъ болургъа, продукцияны тюрлюлерин да кёбейтирге тийишлиди. Къыралгъа магъаналы бёлюмню тамблагъы кюню иги болурча, къойчулукъну айнытыу жаны бла башламчылыкълагъа Россельхозбанк билеклик этип турургъа умутлуду», - дегенди бу финанс учрежденияны келечиси Олег Литяйкин.

Эсге сала айтсакъ, былтыр Россейден тыш къыраллагъа 8,7 минг тонна къой эт жиберилгенди. Продукцияны асламысын Иран, Къытай, Бирлешген Арап Эмиратла, Сауд Аравия, Катар, Къазахстан эм Беларусь Республика алгъандыла. Алада къой этге сурам не заманда да уллуду.