Барды аллай жигит бизни элде

Бусагъатдагъы жаш тёлю не бла айырмалыды, алдагъыла бла тенглешдиргенде? Бек биринчиден, билим алыргъа сюйгенлери бла, профессионал устала болуп, тутхан ишлеринде жетишимли болургъа излегенлери бла. Бусагъатдагъы жаш адамла таукелдиле, оюм эте биледиле, къурау хунерлери, умутларына жетерге итиниулери, оюмларын ачыкъ айтыулары, халкъыбыз минг жылла бла сюрмелеп, сыйдамлап кетген адет-тёрелерибизни билирге,  жюрютюрге излегенлери бла айырмалыдыла.  Аны бла бирге бир магъаналы шартны да иесидиле ала – Ата журтха сюймекликлери уллуду.

Аллай жаш адамладан бири, мени оюмума кёре, кёнделенчи жаш Докаланы Шамилни уланы Юсюпдю. Ол, бек биринчиден, кесини атын музыкагъа хунери бла, жыр айтыргъа фахмусу бла, кертичилиги бла, таза ниети бла айтдыргъанды. Ол къылыкъ хунери бла кесине сый да алгъанды. Биринчи кере аны атын 2007 жылда Элбрус районда «Эжиу этедиле къаяла» деген республикалы эришиу фестивальда эшитгенме. Ол анда алчы жерге чыкъгъаны эллилерибизни къалай къууандыргъаны, ол къууанчха ёхтем да болгъаны эсимдеди.

Юсюп 1990 жылда Кёнделенде туугъанды, «Таулан» жыр къауумну къанат тюбюнде ёсгенди. Аны жыр айтыуда биринчи устазы Жашууланы Башир болгъанды. Школну бошагъандан сора, Юсюп Искусстволаны Шимал-Кавказ къырал институтуну колледжинде Таукенланы Галинаны къолунда окъугъанды. Дагъыда ол Москвада Федерал школда телевидение эм радио ишчилени хазырлагъан бёлюмде билим алгъанды. Бусагъатда Москвада юрист институтладан биринде бийик билим ала турады.

Урунуу жолун Докаланы Юсюп Кёнделенде Маданият юйде кесини жыр айтыу школун, «Эжиу» атлы жыр кружок да ачып, алай башлагъанды. Ол жыр айтыуну тасхаларына юйретген къызчыкъла бла жашчыкъла сахнагъа жулдузчукълача чыкъгъанларын кесим кёргенме бирде. Ала, устазлары сёз айтхынчы, аны кёзюне къарап биле эдиле ол не излегенин. Фахмулу устаз юйретген сабийле элде, районда, республикада, регионда баргъан къууанчлы ишлеге дайым къатышадыла.

Махтаулу жерлешибиз 2023 жылда Шимал Кавказны «Лидер села» деген эришиуюнде да хорламлы болгъанды. Жырлары да, жюрегича, кенгдиле аны. Таматаланы къууандыра, жаш тёлюню ёхтем эте, халкъ жырланы – «Гапалауну», «Боз алашаны», «Жёрмени» эм башха халкъ жырланы аламат айтады Юсюп. Кеси къурагъан «Бир ариу къызны кёргенме», «Келчи, тепсейик», «Сен узакъда», «Непокорные вершины» деген жырлагъа да сюйюп тынгылайдыла адамла. «Сен узакъда» деген жыр рэп халда барады. Ол жангычылыкъ жаш тынгылаучуланы бютюнда къууандыргъаны хакъды.

Къырал сейирлерин къорууларгъа керек болгъанда уа, Юсюп спецназда къуллукъ этерге кетгенди. Ол 2023 жылдан бери аскерчиди. Алгъа медицина курсланы ётюп, «инструктор по тактической медицине» деген усталыкъ алгъанды. Украинада энчи аскер операциягъа къатышады.  Донбассда Горловка шахарны тийресинде къаты сермешледен биринде жаралы да болгъанды. Не тюрлю къазауат да кишиликни, эрликни, тин къатылыкъны сынауду. Ол тюрлю сынауладан  жаш  махтаулу ёте барады. Бирде ол, жаралы болгъан аскерчи тенгин аркъасына кётюрюп, эки километр баргъанды, аны жанын сакълар ючюн, ол анасына сау къайтыр ючюн. Ма аллай кертичиликге, адамлыкъгъа къаты жашды Докаланы Юсюп.

Аны юлгю алыр адамлары да бардыла. Ыннасы Жанатайланы Батайны алты къарындашы бирден сауут алып чыкъгъандыла Уллу Ата журт уруш башланнганда. Ала Алийни жашлары Магомет, Юсюп, Жюнюс, Якуб, Нох эм Хызырдыла. Аладан тёртюсю, Ата журтну къоруулай, жан бергендиле. Ма аллай жигитлени къанлары барады аны  тамырларында. Юсюп кишилиги ючюн Жуков атлы  эмда «Участник СВО» деген майдаллагъа тийишли болгъанды.

 Кёп болмай Юсюп солургъа келип кетгенди. Элни краевед музейине саугъагъа аскер трофей – эрттегили фотоаппарат келтиргенди. Бусагъатда ол уруш аулакъларындады. Аны юйде анасы Шауаланы Нина, тёрт кичи къарындашчыгъы, сау эл да сакълайдыла. Аны бла сёлешгенде ахыр сёзю: «Ата журтума, къыралыма къуллукъ этеме!» – деп, алай болгъанды.
Жашау тирменин ма быллай, тойгъа жан салгъан, къоркъууда сауут алгъан жашла бурадыла.