Саугъала, гюлле да – хунерлилеге

Республикабызда «Кюн шахар» сабий чыгъармачылыкъ академия ачылып, аны хунерлилеге лицейине жюрюген жашла бла къызла болдуруп келген жетишимле бизни барыбызны да кёллендиредиле. Шабат кюнде  бу окъуу юйню быйыл бошагъан 51 адамгъа деп къуралгъан байрам ингир да аны  алайлыгъын бютюнда ачыкълагъанды.

Хар замандача, бу жол да лицейни биринчи даражалы алтын эмда экинчи даражалы кюмюш майдаллагъа бошагъан сабийле да асламдыла. Айхай да, аланы араларында Бир къырал сынаулада 100 балла алгъанла, Окъуучуланы битеуроссей дерс олимпиадаларыны  регион урумунда биринчиле болуп, къырал даражада белгиленнгенле да бардыла.

Ингирни хурметли  къонакълары уа КъМР-ни жарыкъландырыу эмда илму министри Анзор Езаов, КъМР-ни Парламентини Билим бериу, илму эмда жаш тёлюню ишлери жаны бла комитетини башчысы Нина Емузова, республикалы кёп профильли гимназияны таматасыны къуллугъун толтургъан Мурат Арипшев, «Эльбрус» корпоратив университетни башчысы Тамара Айбазова, Сабийлени эмда жаш тёлюню чыгъармачылыкъларыны юйюню директору Аксана Карашева болгъандыла.

Жыйылгъанланы алгъышлай, Анзор  Клишбиевич бюгюннгю выпускникле – ала тамблагъы кюнюбюзню ышаныулугъу болгъанларын чертгенди. Жаш адамла жашауда кеслерини жерлерин табып, чынтты профессионал даражагъа жетип ишлериклерине ийнаннганын да билдиргенди. Билимли, хунерли сабийлени уллу жашаугъа ашыргъан хар заманда да жюрекни къозгъагъан чакъла болгъанларыны юслеринден айта, бу жол лицейни башчыларына, устазларына ата-аналаны жанындан да ыспас этгенди.

Мында окъугъан сабийле, башха-башха олимпиадалада хорламла болдура, махкемени атын иги бла, жаланда Шимал Кавказда угъай, къырал даражада айтдыргъанлары ючюн ёхтемленнгенин билдире, аллай даражагъа анча адамны ичинде жетген да тынч жумуш болмагъанын ангылатханды. Быллай жетишимле ючюн устазлагъа ыразылыгъын дагъыда къатлай, мындан арысында да ол ызда барырларына ышаннганын да айтханды.

Байрамда кёп алгъышла этилгендиле. Нина Гузеровна, Тамара Павловна, Аксана Георгиевна  да лицейни регионубузда къуралгъанын аны юсюнден биринчи оюмла айтылгъан кюнден бери окъуна ахшы шартха санагъанларын чертгендиле. Быллай ингирледе уа мында окъугъанла, ишлегенле да болдургъан жетишимлени эшите, аны республикада барлыгъына жюреклеринде ыразылыкъ сезим бютюнда  кючленнгенин да билдиргендиле. Бийик балла, окъууда эсепле ючюн майдалла – ала школ кезиуню даражалы жетишимлери эселе да, эм алгъа адамлыкъ ышаннга таяна, жашауларын алай бардырыргъа чакъыргъандыла. Бу байрам юйюрлеге да къууанч болгъанын чертип, ата-аналагъа саулукъ-эсенлик тилегендиле.

Ызы бла хычыуун жумуш да башланнганды. Белгилегенибизча, майдаллагъа тийишли болгъанла да аз тюйюл эдиле. Аланы араларында уа Занкишиланы Саида (орус тилден  100 балл алгъанды), Къулбайланы Алий (Окъуучуланы битеуроссей  дерс  олимпиадаларында географиядан къырал даражада призёр), Ботталаны Элина, Джашууланы Алина, Газаланы Амина да бардыла. Ала уа барысы да биринчи даражалы алтын майдалны алгъанларын белгилерчады.

Мурат Хамидбиевич да жашланы бла къызланы, аланы ата-аналарын, устаз къауумну алгъышлагъанды. Адам ишин сюйюп этсе, ол заманда жетишимли да боллугъуна ийнаннганын къатлай, жаш тёлюню жюреклери талпыннган усталыкъланы сайларгъа чакъыргъанды.

Хунерлилеге лицейни башчысы Джаппуланы Тамара уа бу окъуу юй къуралгъанлы да аны бошагъан сабийлени андан ашырыргъа кёзю къыймагъанын хапарлагъанды. Алай эсе да, беш жыл мындан алгъа бери сынаула берип кирген сабийле алагъа ийнаннганланы ышаныулукъларын алдамагъанларына уа бюгюнлюкде ёхтемлик сезимни сынагъанын жашырмагъанды. Ата-аналагъа ала бла байламлыкъ жюрютгенлери, устазланы къыйынларын ангылагъанлары ючюн да ыспас этгенди.

Тамара Бакуевна Анзор Клишбиевичге, Нина Гузеровнагъа да энчи ыразылыгъын билдирип, жыйылгъан жамауатха уа ала экиси да регионну жарыкъландырыу жаны бла министрлери болгъан кезиулеринде академияны, аны бла бирге уа хунерлилеге лицейни ишине дайым да къайгъыргъанлай, эс бургъанлай, тутхучлулукъ этгенлей тургъанларын ангылатханды.

Къууанчлы ингирде устазланы да бир къауумун КъМР-ни Жарыкъландырыу эмда илму министерствосуну дипломлары бла саугъалагъандыла. Аланы санында уа окъуучулары 100 баллагъа тийишли болгъанла эмда регион, къырал урумлада да дерс олимпиадалада алчыла, призёрле болгъанла да бар эдиле.
Жыйылгъанлагъа кеслерини  хунерлерин КъМР-ни сыйлы артисти Азамат Цавкилов, «Кавказны танглары» юлгюлю халкъ тепсеу ансамбль, «Арабеск» шёндюгюлю тепсеу къауум, башхала да саугъалагъандыла. Бютюнда бег а бери келгенле  лицейни бошагъанла кеслери къурагъан саугъагъа ыразы болгъандыла. Ала уа миллет тепсеуню тепсеп, байрам тау той эмда жарыкъ фейерверк бла бошалгъанды.