Ата журтха сюймеклик – биригиулюкде

Жаш тёлюню кюнюне жораланып  «Жаш тёлю бла сабийле» деген миллет проектни чеклеринде  битеуроссей фестиваль бардырылгъанды. Нальчикде бу уллу байрамгъа ууакъ сабийле, жаш адамла, абаданла да къатышхандыла. КъМР-ни Жаш тёлюню ишлери жаны бла  министерствосу  къурагъан байрам жамауатыбызны бирлигин ачыкъ кёргюзтгенди. 

Ол кюн КъМР-ни Правительствосуну башчысыны орунбасары Залим Кашироков, КъМР- ни жаш тёлю  министри Азамат Люев, СВО-ну ветеранлары, волонтёрла  «Нальчик – аскер махтаулукъну шахары» стелагъа гюлле салгъандыла.

Жаш тёлюню ишлери жаны бла министерство фестивальланы жангы  халда бардырады. Кёп адам къатышырча, эркин жерлеге чыгъарады. Кертиси бла да, хар къырал байрамгъа битеу да шахар къатышыргъа керекди. Бу жол а районладан да волонтёрла келген эдиле.

Жаш тёлю министерствону  аллында майданда эм Къоз терек бахчаны  эркин жеринде  оюнладан башлап дерслеге дери кёп иш бардырылгъанды.  Усталаны кёрмючю, лекцияла, спорт эришиуле, чыгъармачылыкъ мастерскойлада мастер-классла, концерт, оюнла къуралгъандыла. Сёзсюз, бу байрамда аслам эс СВО-гъа, патриот юйретиуге бёлюннгенди. Бизни Ата журтубузну сейирлерин къоруулагъанла бюгюнлюкде да отха киредиле, къолларында сауут  бла сермешлеге барадыла,алагъа мамыр, тынч жашагъан россей шахарладан къагъытла келселе, къууанадыла. Аны себепли, «Солдатха письмо» деген акциягъа кёпле къатышхандыла. Адамла солдатлагъа сау-саламат келиригизни сакълайбыз, деп жаза эдиле, къыралыбызгъа керек кюнде  артха турмагъанлары ючюн жюрек ыразылыкъларын билдиргендиле. 

Дагъыда шахарчыла эм туристле солдатларыбызгъа жашырынлыкъны сакъларгъа болушхан сеткала этерге юйреннгендиле, жаш адамла ушкокну ким терк жаяр-жыяр деп эришгендиле. Андан сора да, келгенле биринчи медицина болушлукъ этерге юйреннгендиле. Сабийле уа Къоз терек бахчаны  битеу асфальт жолларын тюрсюнлю мелле бла суратладан толтургъан эдиле. Дагъыда алагъа деп аниматорла ишлегендиле, сейирлик уллу гинжиле тепсегендиле, оюнла къуралгъандыла.

Жаш тёлюню аскер къуллукъгъа хазырлау  эм патриот юйретиу араны башчысы, СВО-гъа къатышхан Заурбек Мазлоев: «Быллай уллу байрамлада жаш адамла къыралыбызны юсюнден сагъыш этерге юйренедиле, жерибизни къорууларгъа кереклисин ангылайдыла», – дегенди.

КъМР- ни жаш тёлю арасыны специалисти Инар Инароков: «Ата журтну сюер ючюн, бек алгъа, аны билирге, таныргъа керекди. Биз ючюнчю жыл ыйых кюнледе хакъсыз  экскурсияла бардырабыз. Солуу кюн атала –анала сабийлери бла, неда студентле, неда жангыз кеслери жашагъан къарт адамла  республикабызны бир ариу жерин кёрюп къайтсала, бек къууанадыла. Билемисиз, мында ёмюрлери жашап, Чегем чучхурланы, Минги тауну кёрмегенле бардыла. Проектге керекли ахча  федерал бюджетден  келеди. Октябрьни ахырына дери экскурсияларыбызны бардырлыкъбыз», - дегенди.

Министерствону аллында майданда уа «Кавказны орамлары» деген фестиваль бардырылгъанды. Анга устала къатышхандыла. Бегийланы Заурну териден этген бел бауларын, сумкаларын хар кёрген, аны фахмусуна бийик багъа бермей кетмегенди. Ёмюрлени теренинден келген  усталыкъла бла бюгюнлюкде да жаш адамла кюрешгенлери бек кёллендиреди, ата-бабаларыбызны ызлары къурумагъанды, чыгъармачылыкъгъа ёчлюклери бюгюн да тамырла бергенлей турады. Таулуну эки къолу бла иш кёллюлюгю, фахмусу кечиндиргендиле, энди да бир зат да тюрленмегенди, ол шартла изленнгенлей турадыла.

Дагъыда бу фестивальда Жулабланы Мунира этген сыргъала, жюзюкле, боюнлукъла кёзге уруна эдиле. Мунираны чыгъармачылыгъында да миллет ыз эсленеди, ол миллет кийимледе, таулу кийизледе накъышланы агъачдан, кюмюшден, темирден этген затларына салады.

Биз бу фестивальгъа къатышхан усталаны юслеринден энчи материалла басмаларыкъбыз. Былайда жаланда бир затны чертирге сюебиз: баям, кёрмючге къатышхан алай бош зат болмаз, уста ишинден сау кюннге айырылады, кёргюзтюрюк, айтырыкъ затларын да хазырлайды. Бир-бирле быллай байрамлагъа къатышыргъа унамайдыла. Алай битеу келгенле таулу усталаны ишлерин кёргенлери  бек  аламат ишди, бизни миллетибизни фахмусу, бети да ачыкъ болуп къаладыла.

Майданда «Кавказны ёхтемлиги» деген кёрмюч да бар эди. Анга жаш бизнесменле къатышхандыла. Сёз ючюн, программирование, робототехника бла байламлы «Академия ТОП» халкъла аралы колледжни эм университетни келечилери Нальчикде филиалны юсюнден толу хапар айта эдиле. Бу окъуу юйге кирир ючюн, ОГЭ неда ЕГЭ керекмейди, аны бошагъандан сора къырал диплом бериледи. Университетде тёрт жыл окъургъа керекди, колледжде уа тогъузунчу классдан сора, эки жыл бла он ай, онбиринчи классдан сора уа бир жыл бла он ай. Бу колледжни неда университетни бошагъан адам реклама эм маркетинг бла кюреширге боллукъду.

Фестивальгъа газет ишчиле да къатышхан эдиле. Ала бюгюнлюкде бизни республикада басмаланнган газетлени, журналланы юслеринден айтхандыла. Жазылама дегенлени аллай онглары болгъанды.  Газетле бла журналла миллетни айныгъанын кёргюзтген шартладан биридиле. Мен адам бла танышсам, аны миллетини  не газетлери, журналлары, театрлары, къаллай адабиятлары болгъанларын сорама. «Нюр» журналны баш редактору Сабанчыланы Арипа да фестивальгъа келгенлени ана тиллеринде газетни, журналланы окъургъа чакъыргъанды. 

Жаш тёлюню кюню республикада алай жарыкъ да, магъаналы да озгъанды.