Магъаналы башламчылыкъ

Сабийлени бла жаш тёлюню чыгъармачылыкъ арасында Орус география обществону «Табийгъат къоркъуусузлукъ» деген битеукъырал жарыкъландырыу башламчылыгъын толтуруп тебирегендиле. Аны мураты адамла табийгъатда болгъанларында, кеслерин тийишлисича жюрютюрге юйретиудю эмда туризмни айнытыуду. 

Обществону жаш тёлю бла ишлеу жаны бла бёлюмюню башчысыны орунбасары Дарья Кабанова айтханыча, башламчылыкъны юсю бла къыралны ичинде туризмни да айнытыргъа белгиленеди. Жаш тёлюге къаллай ариу жерлерибиз болгъанын кёргюзтюрге сюебиз, дегенди ол.

Башламчылыкъны «Альтаир» жаш тёлю биригиу къурагъанды. Аны алгъыннгы башчысы Мокъаланы Тенгизни къолунда 2017 жылдан башлап, «Къоркъуусузлукъну школунда» жаш адамла къаялагъа ёрлерге юйреннгендиле, краеведениядан бла спорт волонтёрстводан билим алгъандыла. Тенгиз бюгюнлюкде Орус география обществону Жаш тёлю арасына башчылыкъ этеди. Ол айтханыча, сабийле алгъа билимни дерследе алгъандыла, ызы бла аны керти болумлада, таулада, бегитгендиле. «Бу сынамны ала бек жаратхандыла, артда да къайтарыргъа сюйгендиле. Алай бла къоркъуусузлукъну школу жыл сайын бардырылып тебирегенди, экспертле да анга бийик багъа бичгендиле.  Анга кёре табийгъатда къоркъуусузлукъгъа башха-башха болумлада юйретип башлагъандыла: таулада, агъачлада, суулада бла дорбунлада», - дегенди ол.

Бу кюнледе да регионда тау лагерь къуралгъанды, анга къыралны онеки регионундан онбеш жаш адам къатышадыла. «Башха-башха жерледен адамла бир башламчылыкъны чегинде бир бирлери бла танышханлары, таза хауада, ариу табийгъатда артда жашауларында да жарарыкъ билим алгъанлары, айхай да, ахшыды. Аны юсю бла уа къыралыбызны халкъларыны араларында шуёхлукъ да кючленеди», - дегенди, аны юсюнден оюмун билдире, жаш тёлюню ишлери жаны бла министр Азамат Люев. 

Лагерьде Минги тауда жаш адамла бийик таулада тири солууну энчиликлерине тюшюнюрюкдюле, ачыгъаннга биринчи болушлукъну этерге эмда аны къоркъуусуз жерге элтирге, къаялада керекли затланы да хайырлана, ёрлерге юйренирикдиле.