Кир-кипчикни, къауданны да кюйдюрмегиз

Сабанлада тирликни эмда мирзеуню жыйып бошагъандан сора, бирле анда къалгъан саламны неда къауданны кюйдюрюрге ёч болуучудула. Хайырланылмай тургъан жерлени да алай тазаларгъа тюзелгенле аз тюйюлдюле. Бирле уа кир-кипчикни жерине кетермей, бахчада кюйдюрюп къурутургъа кюрешедиле. Аны барын да этерге жарамагъанын а кёпле билмейдиле, билгенле уа бу жорукъну сансыз этедиле.

Къауданны, кир-кипчикни кюйдюрюу, экологиягъа, адамланы саулукъларына да хаталыды. Республиканы от тюшюуге къажау-къутхарыу службасында аны къайтарып эсгередиле. Къургъакъ кырдык терк къабынады, андан от а, олсагъат тёгерекге жайылып, юйлеге, промышленность мекямлагъа жетерге, адамлагъа да уллу хата салыргъа боллукъду.

Эм уллу проблема – отну ёчюлтген техника къаудан кюе тургъан жерде болгъанда, башха жерлеге, жашау журтлагъа от тюшюп, ол алада жеталмай къалыргъа боллукъду. Быллай кезиуледе уа хар такъыйкъа да магъаналыды.

Алайды да, хурметли жамауат, от бла ойнамагъыз, къауданны, кир-кипчикни кюйдюрмегиз! Аны ючюн къуру эсгертиу этилип къаллыкъ тюйюлдю. Абериге хата тюшсе, от салгъан инсан административ неда уголовный жууапха тартыллыкъды.