Ариу жыйрыкъла, сейир макъамла да

Халкъны къолдан усталыгъыны кюнюне аталып, Нальчикде Къабарты орамны жаяу кесегинде кёрмюч къуралгъанды, анга битеу да республикадан къолдан устала чакъырылгъандыла. 

Къараучулагъа анда кёп сейир зат жыйылгъанды - жаш тигиучюле тикген ариу жыйрыкъла, къыл къобузла, ариу жасалгъан бичакъла бла эрттегили амалла бла ишленнген къамала. Сюйгенле уа бу усталыкъланы жашырынлыкъларына да тюшюннгендиле.

Юлгюге, Россейни халкъ устасы, ювелир Курданланы Рашит кёргюзтген къаманы алтын жазыула жасайдыла, сабы эрттегили пилни сюегинден ишленнгенди. Быллай затланы багъаларын тохташдыргъан тынч тюйюлдю, бирле багъаны темирни ауурлугъуна, башхала уа къаллай бир къыйын кетгенине кёре саладыла.    

Халкъны къолдан чыгъармачылыгъыны арасыны башчысы Аслан Урусов айтханыча, бюгюн бери чынтты устала келгендиле, аланы саны отуздан аслам болгъанды. «Республикабызда  сынамлы, бийик усталыкълы абадан устала да бардыла, алай кёрмючге жаш адамла къатышханлары уа бютюн къууандырады. Юлгюге Терковланы юйюрлерин келтирирге боллукъду. Идар, гитче эсе да, атасындан юйренип, жёгенлени жарашдырады», – дейди ол. 

Кёрмючню къонакълары ариу макъамлагъа да тынгылагъандыла,  аланы араларында Парламентни депутаты Текуланы Амырбий да болгъанды. «Согъаргъа гитчеликден юйреннгенме, аны ючюн манга бу макъамла хычыуун кёрюннгендиле. Быллай ярмарка-кёрмючлени терк-терк къураргъа керекди, аны хайыры бла республикада жашагъанла, къонакъла да битеу бу байлыкъны, къолдан усталыкъла бла кюреширча къаллай фахму, къыйын да керек болгъанын кёрлюкдюле», - дегенди ол.

Быллай жерледе республикабызны миллетлерини маданиятлары ачыкъланады, аны бла тышындан келгенле да сюйюп шагъырейленедиле, жаратхан затларын а сатып да алаладыла. Аны башха магъанасы да барды – аны амалы бла ата-бабаларыбыздан сакъланып келген тин, санат байлыгъыбыз ёсе келген тёлюлеге да ётдюрюледи, ол жаш адамлагъа сейир болгъанын да белгилерчады. Халкъ къолдан чыгъармачылыкъ араны борчу уа бу ишни сайлагъан адамлагъа себеплик этиудю да, ол да тынгылы толтурулады.