Устазлыкъны жюреклери бла сайлагъанла

Къабарты-Малкъар гуманитар-техника колледжни  «Башланнган классланы эм школгъа дери билим берген учрежденияланы устазлары» бёлюмюню окъуучулары «Россейни Югуну билим бериу кластери» деген проектни чеклеринде бардырылгъан олимпиаданы ахыргъы урумуна къатышхандыла.

Анга къатышхан хар жаш адам  да жууапларына жюреклеринден бир юлюш, жылыу салгъандыла. Окъугъан, билим алгъан жылланы ичинде  юйреннгенлерин да тамам кёргюзталгъандыла.
Къысха заманда устазлыкъ ишни  бардырлыкъ жаш тёлю  бийик билимин кёргюзтгенди. Сабийлеге болгъан сюймекликлери ючюн сайлагъан усталыкъларын сыйлы кёргенлерин да ачыкълаялгъандыла ала. Аны себепли уа жаланда алчы жерлеге тийишли болгъандыла. 

Устазлыкъны кёпле сайласала да, чынтты устазла уа аладан  алай кёбю болалмайдыла. Устазлыкъ – ол  сау жашауду, дунияды, сабийни  хар сезимин ангылай билиудю, анга болушлукъ этерге хазырлыкъды. Бу жаш адамла   аллай хазырлыкъларын шарт кёргюзтгенлери  себепли биз аланы ол жетишимлери бла алгъышлайбыз.