Бизге эм багъалысы – окъуучуларыбызны ыразылыкълары, аланы оюмлары

Ана тилибизде газет чыгъып тебирегенли анда ишлегенле окъуучулары бла байламлыкъны юзмегенлей, аланы оюмларын билгенлей, изданияны бетлерин сейир эм окъуулу этер ючюн аланы эсге алгъанлай  келедиле. Бюгюнлюкде да ол ашхы тёре юзюлмейди, тири бардырылады дерге боллукъбуз. Газетни эки-юч бети толусунлай малкъар халкъны харкюнлюк турмушуна, тарыхына, маданият хазнасына, адабият да, спорт да болгъан жангылыкъларына, тёрелерине эмда адетлерине, белгили, фахмулу адамларыбызгъа, алгъа баргъан жаш тёлюбюзге жораланнганлай  турадыла. 

Редакцияны журналистлери, эллерибизге жюрюп, алада жашагъанланы юслеринден материалла хазырлайдыла. Биз аланы бир бетге жыйып,  «Элни хазнасы – жигер, хунерли эмда чомарт адамлары»,  «Мамырлыкъны эмда шуёхлукъну айнытыу, къууанчлы жашауубузну тутуругъу» эм башха энчи рубрикала къурап, эллени тарыхлары  бла да шагъырейлендирип, алай   басмалайбыз.  Жаланда арт кезиуде окъуна журналистлерибиз Огъары Жемталада, Огъары Малкъарда, Тырныауузда, Къашхатауда, Элбрусда, Тёбен Чегемде, Хушто-Сыртда бир ненча кере болгъандыла. 

Газет тукъум жыйылыуланы, окъуучуланы араларында ана тилни сакъларгъа эм айнытыргъа жораланнган тюрлю-тюрлю эришиулени юслеринден  билдириулени басмалагъанлай турады.

Быйыл Уллу Хорламны 80-жыллыгъын белгилегенибиз бла байламлы газетни бетлеринде урушха къатышхан жигитлерибизни юслеринден материалла   кёп санда чыкъгъандыла. Ата журтну къоруулаучусуну жылыны чеклеринде атап,  энчи аскер операцияда борчларын толтургъанлагъа энчи эс бурулады изданиябызда. Ол да бошдан тюйюлдю: бюгюнлюкде тарыхны  унутдурургъа, жаш тёлюбюзню эслерин терс жанына бурургъа кюрешгенле  бардыла. Газетни баш борчларындан бири – жашауубузгъа къужур келген затланы терслерге эмда ёсюп келген тёлюню патриот ниетледе юйретирге.  

Озгъан жазылыу кампанияда газетде ишлегенлени эм изданияны чынтты шуёхларыны хайырындан «Заман» быйылны  экинчи жарымыны тиражы бла бирси республикалы газетлени иги да хорлагъанды.  Ол окъуучула бла байламлыкъны къысха жюрютгенибизни эмда газетни жамауат багъалагъаныны бир белгисиди. Дагъыда бир шарт, редакцияда ишлегенле, къолайлары болгъан жашларыбыз бла биригип, энчи аскер операциягъа къатышханлагъа эм ветеранлагъа сексенден аслам газет жаздыргъандыла. Ол ишни Теммукуланы Асият башлагъан эди, сора эл администрация бла  бешишер адамгъа тизмени жарашдырып, ол магъаналы жумушну алай тамамлагъанбыз. 

Бу юлгюню келтиргеним не ючюндю, биз эллерибиз бла байламлыкъны кючлеген болмаса, юзген бир заманда да этмегенбиз. Башда сагъынылгъаныча, редколлегияларыбызда газетни айныу жолу сюзюлгенде окъуучуларыбызны оюмлары не заманда да эсге алынадыла. Дагъыда командировкалада болгъан кезиулерибизде аны бетлерин  игилендириу бла байламлы оюмланы да излеучюбюз. Шёндю да ол ишни журналистлерибиз тири бардырадыла. Кюз артында Быллымны школунда   аллай бир тюбешиу къурар муратыбыз барды. 

Окъуучула бла тюбешиулени бардыргъанда, башха жерледе да газетигиз сейир тюйюлдю, халатла да жибересиз, къуру бир адамланы юслеринден жазып турасыз деген сёзлени да эшитиучюбюз. Хар айтылгъан оюмну газетни редколлегиясы эсге алады, ала планёркаларыбызда да сюзюледиле, тийишли мадарла да этиледиле. Алай бир къауумланы айтханлары бла келишмезге да боллукъду. Къайсы номерде, къалайда халат тапхансыз, къайсы материалланы, не ючюн жаратмайсыз деп сорсакъ, ол соруугъа хазна тынгылы жууап бермеучюдюле, жарсыугъа. Бирде ала газетни окъуй болмазла деп келеди кёлюме. Анга да къарамай, биз окъуучуларыбыз бла ишлейбиз, халкъны игиси, эслиси элллерибизде жашайдыла, аланы оюмлары болмагъанча магъаналыды бизге. 

Кесигиз билгенликден   халкъыбызны саны, башхала бла тенглешдиргенде, аз болгъанлыкъгъа, аны белгили, айтхылы, фахмулу адамлары эл бла бир бардыла, насыпха. Ийнаныгъыз, биз аланы окъуучуларыбызгъа туура этер ючюн къалмайбыз, республикадан кетип жашагъанланы да. Ол бизге махтау тюйюлдю, ол бизни ишибизди. Сёз ючюн, Къулийланы Къайсынны, Байсолтанланы Алимни, Энейланы Тимурну эм башха белгили адамларыбызны юслеринден бир жангылыкъ чыкъгъанлай, газет аны билдирмей къоймайды. Ма аны ючюн бир-бирде аланы юслеринден къайтарып  берирге тюшеди материалны, ол керекди халкъгъа, артыкъда жаш тёлюбюзге, деген хыйсап бла.

Сёз ючюн, жаш композиторубуз Малкъондуланы Ахматны юсюнден билдириулени биз хазырламасакъ, ким жазарыкъды.   Кёп болмай Ахматны  Мариин театрда битеу дуниягъа белгили Валерий Гергиев дирижёрлукъ этип согъулгъан, Уллу Ата журт урушну 80-жыллыгъына жораланнган «Тал терек» деген  симфониясыны премьерасы  болгъан эди. Мени оюмума кёре, аллай жашларыбыз бла биз ёхтемленирге керекбиз, белгили дирижёр анга алай сый бергенине да. Ма аны юсюнден жазгъанды Жангоразланы Нажабат газетни бетинде Ахмат бла этген интервьюсунда. Неда Тикаланы Фатиматны битеу республика таныгъан КъМР-ни Парламентини маданият комитетини  таматасы, республиканы халкъ артисти Текуланы Амырбий бла этен ушакъны, адам солууун  алмай окъурукъду, асыры сейирден эм магъаналыдан. 

Фатиматны шабат кюн СВО- гъа къатышхан жигитибиз Гыллыланы Ибрагим бла басмаланнган интервьюсу да тюз алайды.  

Газетни бетлеринде билимли жаш тёлюбюзню халкъгъа туура этиу бла Мокъаланы Зухура тамамлагъан ишни Басманы юйюнде окъуна бир журналист этмейди.  Битеу халкъ таныгъан Мусукаланы Сакинатны бла Османланы Хыйсаны тарыхыбызгъа, маданият хазнабызгъа жораланнган материалларына окъуучуларыбыз ыразылыкъларын билдирир ючюн къалмайдыла бизге.

Бу юлгюлени не ючюн келтиргеними да ангылатайым: хар элде, тукъумда,  юйюрде да бардыла фахмулула, газетни бетлерине тюшерча инсанла. Хурметли окъуучуларыбыз, сиз ала бла къаршыда турасыз, жашайсыз, къайда окъугъанларын, не бла кюрешгенлерин да иги билесиз. Айтырыгъым, аллай не иш кёллю, алгъа барыргъа учунуулукълары болгъан жашларыбызны бла къызларыбызны юслеринден хапарланы билдире турсагъыз,газетни бетлери андан да окъуулу  боллукъдула.  

Газетни редколлегиясыны изданиябызны, сайтыбызны, телеграм-каналыбызны да андан ары айнытыр жаны бла ашхы, уллу  муратлары да бардыла.  Ол жаны бла коллектив къолундан келгенни аямай ишлерикди, окъуучуларыбыздан да тюрлю-тюрлю оюмланы сакълайбыз. Биз ачыкъбыз, халкъ бла байламлыкъны тири жюрютюрге, бир бирге тынгыларгъа, бир бирни эшитирге да. Газетде бюгюнлюкде тёрт корреспондент, бир алчы специалист керек да болгъанларын  да билдирирге сюеме. 

Соруулары, оюмлары болгъанла  редакцияны элетрон почтасына (elbor_50@mail.ru) неда бу телефонлагъа сёлеширге боллукъдула: 42-63-01, 8-928-717 62 50.