Фильм – хунерликни шагъаты

Бу кюнледе республиканы  Маданият  фондунда белгили кинорежиссёр Владимир Вороковну  «Иван» деген документли фильмин кёргюзтюуге жораланнган тюбешиу болгъанды. Ол Маданият фондну председатели Люаза Макоева  къурагъан «Хроника о Кабардино-Балкарии» деген проектни чеклеринде бардырылгъанды. Анга тийшлиликде кёргюзтюлген  бу экинчи фильмди. Биринчиси уа Владимир Халидовичге жораланнган эди. «Иваннга» къараргъа кёп адам келгенди.

Фильм Уллу Ата журт урушну кезиуюнде  фашизмге къажау сюелген жигит жерлешибиз, Прохладна районну Светловодское  элинде жашагъан Иван Тимофеевич Барановскийни юсюнден хапарлайды. Ол уруш башланнган биринчи кюнден окъуна къолуна сауут алып, Ата журтну немисли малгъунладан  къорууларгъа сюелгенди. Къазауатладан биринде  жаралы болуп, тутмакъгъа тюшеди, андан да  къачып къутулгъанды, ызы бла  уа италиячылагъа  къошулуп,  фашистлеге къажау бардырылгъан урушха къатышханды.

Владимир Вороковну бла Рина Мартиросованы бу фильмлери 2009 жылда  алыннганды.

Киногъа къарагъанла Светловодск элни шёндюгю заманын кёргендиле, жигитни юйюрюню юсюнден хапар билгендиле. Кинону хазырлагъанла  Италияны  Альяно шахарында да болгъандыла, Иван анда  жигитча сермеше жан бергенди, ол жерлиле уа анга  эсгертме сюегендиле.

Фильм бошалгъандан сора анга къараргъа келгенлени аллында Александр Пачаджи эмда  Владимир Карповский  сёлешгендиле. Ала ол заманда  НОТР телекомпанияда ишлегендиле.  Ала  фильм къалай къуралгъанын, аны бла байламлы кимле  ишлегенлерин, къайда болгъанларын эмда Вороков бла къалай ишлегенлерини юсюнден да  хапарла айтхандыла.

-Жашауумда аллай адамгъа тюбегеним, аны бла  кёп жылланы ишлегеним бла байламлы ёхтемленирге боллукъма. Нек дегенде  кёп затны юсюнден билгенме, уллу сынау да жыйышдыргъанма. Ол а багъалы хазнады. Владимир Вороков чынтты тележурналист эди. НОТР-да ишге жашаууму иги кесек заманын бергенме, бу адамны юсюнден бирле айтып угъай, кесим билеме, бирге кёп туз-гыржын ашагъанбыз. Владимир Халидовични юсюнден айтханда, дагъыда ол кесин толусунлай чыгъармачылыкъ ишге эмда культурагъа жоралагъанын да белгилемей жарамаз. Бир-бирледе, бизни аллыбызда тамамланылмазлыкъ борчла салгъаннга ушай эди, алай не заманда да бизге ийнанып, керек болса уа,  болушлукъ этерден да артха турмагъанды.

Маданият фондну председатели Люаза Макоева да  ишлегенди Владимир Халидович бла иги кесек жылны ичинде. «Владимир Вороков къаллай ишни къолгъа алса да  аны тынгылы тамамлагъынчы тынчаймагъанды. Тутхан ишине жюреги бла  берилгенди, аны бек сюйгенди. Бизни да алай ишлерге юйретгенди. Бюгюнлюкде фондну архивинде ол алгъан жюзле бла документли фильмле сакъланадыла. Ала республиканы, аны адамларыны тюненеги кюнюню тарых хазналарыдыла. Владимир Халидовични аты аны таныгъанланы, бир кере окъуна аны бла тюбешгенлени эслеринде  ёмюрге къаллыкъды. Ишлери уа  ёсюп келген кинематографистлени кёллендирликдиле. Энчи «Иван» деген фильмни юсюнден айтханда уа, ол кёп тюрлю Россейли конкурслада хорлап тургъанды. Волгоградда бардырылгъан халкъла аралы конкурсда да биринчи жерге тийишли болгъанды. «Къабарты-Малкъарны юсюнден хроника» деген проект  а  сейирлик кадрланы кёрюр амал табыу бла чекленип къалмай, В.Х.Вороковну чыгъармачылыкъ фахмусун да кёрюудю, фильмлени авторлары, операторлары бла тюбешиудю эмда  Ата журтну  къоруулагъанланы, атын айтдыргъан адамланы къадарлары бла шагъырейлениудю»,-дегенди Люаза Макоева да.

Владимир Вороковну юсюнден, ол алгъан фильмлени  кёргенле да эсгергендиле, кеслерини оюмларын айтхандыла.