Къабарты-Малкъар Республиканы Башчысы К.В.Коковну Эсде тутууну эмда бушууну кюню бла байламлы чакъырыу сёзю

Къабарты-Малкъарны хурметли жамауаты!
22 июнь тарых жолубузда бек бушуулу кюнледен бирине саналады. Ол кюн 84 жыл мындан алгъа Уллу Ата журт уруш башланнганды. Къыралыбызгъа ол бир заманда да болмагъанча къыйын сынау эди. Аны ачылыгъын сынамагъан бир юйюр да къалгъан болмаз. Аны ючюн болур, ол кюйсюз заман бизден  узая баргъаны къадар, Ата журтубузну эркинлигин бла жалынчакъсызлыгъын къоруулагъан, адам улуну нацизмден къутхаргъан халкъыбызны жигитлигини деменгилилигин ол къадар шарт сезе барабыз.
Хорлам ючюн къаллай уллу багъа тёленнгенин арталлыда унутургъа жарарыкъ тюйюлдю. 27 миллион адамны жашаулары – аллай багъаны дунияны бир къыралы да тёлемегенди.
  Къабарты-Малкъарны да фронтха кетген 60 минг уланындан бла къызындан 40 минги юйлерине къайтмагъандыла. Урушда жан бергенлени эмда аны хатасындан ёлгенлени, жашаудан кетген ветеранларыбызны  атларын биз бир заманда да унутурукъ тюйюлбюз, аланы кишиликлерине баш урабыз.
Совет халкъны жигитлигини, Ата журтну керти тарыхыны юсюнден ёсюп келген тёлюле да билирча эмда унутмазча этиу бизни сыйлы борчубузду.
Быйылгъы жыл Уллу Хорламны 80-жыллыгъыны белгиси бла ётеди эмда Ата журтну къоруулаучуларына, фашизмни ууатхан жигит абадан тёлюбюзге, аланы бюгюнлюкде энчи аскер операцияда Россейни жалынчакъсызлыгъы эмда къоркъуусузлугъу ючюн жанларын-къанларын аямай сермешген махтаулу туудукъларына жораланады. Алгъынча, Хорлам бизники боллугъуна бир тюрлю ишеклигим жокъду!
Уллу Ата журт урушда ёлгенлени атлары ёмюрде да унутулмасынла!
Ата журтубузну къоруулаучуларына ёмюрлюк махтау!