Кёк отлукъ ючюн борчларын кёпле жапхандыла

«Газпром межрегионгаз Нальчик» компания хайырланыучуланы жанындан тёлеу низам иги болурча дайым кюрешеди. Быйыл кёк отлукъ ючюн борчлары болгъанлагъа он мингден артыкъ билдириу жиберилгенди. Юйлерине келген газ кесиллигин эшитгенден сора кёплери тёлеп къутулургъа ашыкъгъандыла. Аны хайырындан компанияны бохчасына 13,8 миллион сом тюшгенди. Къалгъанла бла уа иш андан ары бардырыллыкъды.

Компанияда айтханларына кёре, эки айны ичинде тёлемей тургъан абонентге жыйырма кюнден сора,  газ кесиллигин билдиредиле. Эсгериуге кёз-къаш бермегенлени юйлерине ызы бла аны адамлары барып, ишин этип кетедиле. Газны жангыдан къошар ючюн а,  бу жумушланы эмда борчну толусунлай тёлерге тюшерикди. «Ишни анга жетдирмезге кюрешигиз, кёк отлукъну багъасын заманында беригиз», - деп чакъыргъанды «Газпром межрегионгаз Нальчик» биригиуню башчысы Залим Вороков.

Форумгъа чакъырадыла

Келир 24 эм 25 июньда «Синдика» къонакъ юйде «Общесистемные меры поддержки субъектов деятельности в сфере промышленности 2.0» форум бардырыллыкъды. Аны КъМР-ни Экономиканы айнытыу министерствону болушлугъу бла «Мени бизнесим» ара эмда Гарантияла берген фонд бардырадыла.

Аны биринчи кюню производствону айнытыугъа эмда къыйматлылыгъын кючлендириуге жораланырыкъды. Сёз анда промышленность бёлюмде къармашханланы финансла жаны бла онгдурууну, «Урунууну къыйматлыгъы» миллет проект берген жангы амалланы, «Жумушланы Фабрикасы» проектни хайырыны юслеринден барлыкъды. Форумну экинчи кюнюнде уа бизнесге къыралны жанындан билеклик этиуню юсюнден сёлеширикдиле.

Экспертле эмда власть органланы келечилери кеслеринде эмда башхалада болгъан ахшы сынамла бла шагъырейлендирликдиле, онгланы бизнесни айнытыуда толуракъ хайырланыргъа юйретирикдиле, соруулагъа да жууап берликдиле.

Ишлеринде къыйматлы амалланы сингдиредиле

Къабарты-Малкъардан алты предприятие «Урунууну къыйматлылыгъы» федерал проектни чеклеринде ишлеринде шёндюгю амалланы сингдириу бла тири кюрешедиле, деп билдиргендиле республиканы Экономиканы айнытыу министерствосундан.

Предпринимательлеге себепликге КъМР-де Бизнес-инкубаторда «Жумушланы Фабрикасы» деген билим бериу программа бардырылады. Анда ишге аяулу амалланы сингдирирге, аланы хайырланыргъа юйретедиле.

Быйыл бу проектге саулай къыралдан минг чакълы компания къатышырыкъды, келир беш жылны ичинде уа аланы саны алты мингнге жетерикди. Экспертле аланы келечилерин логистиканы игилендирирге, оборудованияны да тынгылы ишлетирге юйретедиле. Ол бары да «Къыйматлы эмда конкуренциягъа чыдамлы экономика» миллет проектни хайырындан этиледи.