Предпринимательствону магъанасы уллу болгъанын чертгендиле

«КъМР-де предпринимательствогъа чурумла эмда аны айнытыу жоллары» темагъа жораланнган «тёгерек стол» кёп болмай Къабарты-Малкъар къырал аграр университетде ётгенди. Вузну экономика бёлюмюнде бардырылгъан жыйылыуда устазла эмда студентле къуру бизни республикада угъай, саулай Россейде предприятияланы эмда организацияланы ишлерини, ала къаллай чурумлагъа тюбегенлерини юсюнден сёлешгендиле.

Ушакъгъа преподавательле Рахайланы Хадис, Жангоразланы Жансурат, Баккуланы Эльдар, Залина Иванова эм башхала къатышхандыла. Регионну Экономиканы айнытыу министерствосуну информация-аналитика бёлюмюню таматасы Фатимат Абазова гитче эмда орта предпринимательство бизни республиканы экономикасында нечик магъаналы болгъанын туура этгенди, министерство алагъа не жаны бла билеклик этгенин да айтханды.

 Бу тема бла байламлы «Къырал эмда муниципал оноу этиу» бёлюмде окъугъан талай студент да докладларын окъугъанды. Ала гитче бизнес къаллай чурумлагъа тюбегенин ачыкълагъандыла, жаш тёлю предпринимательствону эмда къырал-иели байламлыкълада тамамлана тургъан проектлени юсюнден хапарлагъандыла, «Къыйматлы эмда конкуренциягъа чыдамлы экономика» миллет проектни чеклеринде алагъа къырал къалай болушханын билдиргендиле, гитче бизнес цифралы болумда нечик тюрлене баргъанын да ойлагъандыла.

Жыйылыуну къурагъанла, анга къатышханла да бу «тёгерек столну» кезиуюнде кётюрюлген сорууланы, илму жамауатны алагъа кёз къарамыны да магъанасы уллу болгъанын чертгендиле.