Сабий биригиуле бла байламлыкъланы кючлей

«Чеклени кенгерте» деген аты бла Чегемде бешинчи мектепде сабий биригиуле бла байламлыкъла жюрютюу жаны бла форум къуралгъанды. Анда иш 7 майданда бардырылгъанды.

Аны къууанчлы халда ачылыуунда жыйылгъанланы къуллукъчула алгъышлагъандыла эмда жетишимли ишлерлерин тежегендиле. Ала, устазлагъа уллу жууаплылыкъ салыннганын чертип, усталыкъларында айырмалы болгъанланы белгилегендиле.

- Бусагъатдагъы Россей, жамауат саулай да устазлагъа чексиз ыразы болургъа, хурмет этерге керекдиле. Къыйын токъсанынчы жыллада къыралыбызны ала сакълагъандыла. Аны ючюн бир бирибизге сакъ болайыкъ, бир бирни багъалайыкъ, - дегенди жаш тёлюню ишлери жаны бла министр Азамат Люев.

Устаз Тамирлан Шибзухов а быллай форумлада жангы билим, сынам алыргъа боллугъун белгилейди. Бу жол да бир сейир зат билирме деген умутдама, аны артда сабийле бла ишлеуде, айхай да, хайырланырыкъма», - дегенди ол.

Устазла бла мектеплени башчыларыны кенгешчилери уа сахнада фахмулары бла сейирсиндиргендиле. «Сабийликни жол кёргюзтюучюсю» битеукъырал проект къалай толтурулгъаны кёргюзтюлгенден сора иш да башланнганды. Энчи эс окъуучула, аланы ата-аналары бла араны къураугъа, насийхатчылыкъгъа бёлюннгенди.