Устазла хунерлерин ачыкълайдыла

Бюгюнлюкде Къабарты-Малкъарда «Жюрегими сабийлеге береме!» атлы Битеуроссей усталыкъ эришиуню регион даражалы уруму бардырылгъан кезиудю. Быйыл анга республиканы къошакъ билим берген махкемелеринден 40 устаз къатышады. Конкурсну сегиз бёлюмю барды.

Аны къууанчлы халда ачылыуу уа Нальчикде Сабийлени бла жаш тёлюню чыгъармачылыкъ юйлеринде болгъанды. Жыйылгъанланы алларында КъМР-ни жарыкъландырыу эмда илму министрини орунбасары Екатерина Мисостова, аны къошакъ билим бериу эмда юйретиу бёлюмюню таматасы Бэлла Дышекова, регионну сабийлеге къошакъ билим берген модель арасыны башчысы Таппасханланы Марина сёлешгендиле эмда эришиуге къатышханлагъа жетишим, илхам да тежегендиле.

Биринчи кюнде устазла теория жаны бла билимлерин ачыкълагъандыла. Аны уа «Сабийлени къошакъ халда окъутууну магъаналы ызлары» деген тема бла байламлы берген жууаплары бла баямлагъандыла. Андан сора да, педагогла хунерлерин дерследе эмда «Къошакъ билим бериуню къурауну жангы тюрлюлерин окъутуугъа бла юйретиуге кийириу» деген мастер-классда кёргюзтгендиле. Жууукъ заманда эришиуню кезиулю уруму боллукъду.