Жыйрыкъларына къачан да энчи эс бёлюнеди

  Халкъыбызны бир-бир уста адамларыны къол ызларыны байлыгъы болмагъанча сейирге къалдырады. Хунерликни бла фахмулукъну Аллах алагъа бир уллу саугъаныча, халкъларыны атын айтдырырча бергенине мен, нек эсе да, бек ийнанама. Бизни ынналарыбызны асламы да къолдан уста эдиле. Тигерге, накъышла салыргъа да бек сюйгендиле. Жарсыугъа, аллайланы саны бюгюнлюкде жокъну орунундады. Жаш тёлюден ол затха сейирлери болгъанла чыкъмасала уа, бу зат хазнабыздан къуруп къалыргъа  къоркъуу барды. Мен оюм этгенден, бюгюнлюкде миллетибизде аллай фахмулу къызладан бири модельер Аккуланы Альбинады. Ол а жаланда мени кёз къарамым тюйюлдю. Аны чексиз хунерлигине Москвада ётген кёрмючледе бла кёргюзтюуледе болгъан айтхылыкъ специалистле да бийик багъа бичедиле. Вячеслав Зайцевни мода юйюню модельле агентствосуну директору Екатерина Пантелееваны оюмуна кёре, Альбинаны жыйрыкъларын битеу дуния кёрюрге керекди эм аланы жерлери белгили музейледеди.

  Озгъан жылны ахырында уа Альбина «Деловая высота -2024» деген саугъагъа тийишли болгъанды. Ол анга миллет чыгъармачылыкъны бла тёрелени сакълаугъа салгъан къыйыны ючюн берилгенди. 

  Биз да аны бла ушакъ бардырып, ол бу усталыкъны не себепден сайлагъанын эм миллет чыгъармачылыгъыбызны айнытыугъа къайдан сейири болгъанын ачыкъларгъа кюрешгенбиз.

- Альбина, сени хунерлигинг кёплени сейирсиндиреди. Миллет жыйрыкълагъа жангыдан «жан салгъанладан» бирисе бюгюнлюкде деп, таукел айтыргъа боллукъду санга. Къалай бла башлагъанса бу иш бла кюрешип?

 - Школда окъугъан жылларымдан да чыгъармачылыкъ бла кюреширге бек сюйгенме. Рисование дерсни уа бютюнда. Школдан сора КъМКъУ-ну Дизайн колледжине модельерге окъургъа киреме. Анда юч жыл окъуп, университетибизни Дизайн институтуна кирип, билимими андан ары ёсдюрюрге сюйгенме. Миллет кийимлени анда теренирек тинтип, аны энчилигини юсюнден окъуп башлайма. Накъышлагъа, аланы салыуда техникаланы тюрлюлерине, алтын халыла бла, инжиле бла къалай жасаргъа боллугъуна да анда юйреннгенма. Бир такъыйкъада ангылайма жашаууму буи иш бла байламлы этерге сюйгеними. Нек дегенде, болмагъанча уллу зауукълукъ келтире эди ол манга. Сора окъууну кезиуюнде тюрлю-тюрлю конкурслагъа да къатышыргъа бек сюе эдим. Сёз ючюн, «Стильный акцент» деген эришиуде 1 жерни алгъан эдим. Анда да юч жыл окъуйма. Бир къауум заманны миллет кийимлеге ушатып, къууанчлагъа киерча жыйрыкъла тигип башлайма.

 - Диплом ишинг эсингдемиди?

- Хау. Аны да мен кеси миллет жыйрыгъыбызны шёндюгюлю тёлюле киерча тюрлюсюнча жарашдыргъан эдим. Накъышла салыуда кесибизде ёсген хансланы да тюшюрюрге сюйгенме. Дагъыда инжиле бла да  ариу жасагъан эдим. Экзамен алгъанла аны болмагъанча бек жаратхан эдиле.

   - Мен эслегенден, сени жыйрыкъларынгда тёрели накъышладан сора да къанатлыланы суратлары да бардыла. Къанкъазныкъы, сёз ючюн. Керти да, башхаланыкъына ушамайдыла ишлеринг...

- Миллет чепкенлени мен ариу къанатлыгъа ушатама. Билекликлени  къанатлача кёреме. Къанкъаз бла  таулу къызны тенглешдиреме: аныча субай эм ариу. Дагъыда орус халкъны чыгъармаларындан биринде феникс деген къанатлы барды. Аны барыбыз да билебиз къаллай болгъанын. Ма малкъар халкъымы да  аны бла тенглешдиреме. Бушуулу жылладан сора ол да, тюз аныча, кюлден жангырып, кюч-къарыу алып, бюгюнлюкде башха миллетледен артха къалмай жашау этеди. Битеу бу айтханым мени кесими энчи философия кёз къарамымды.

   - Хазырлагъан жыйрыкъларынг бла къатышхан биринчи эришиуюнг эсингдемиди?

- Хау, эсимдеди. Ол жаш модельерлени араларында бардырылгъан «Русский силуэт» деген конкурс эди. Ары мен «Эхо гор» деген коллекциямы кёргюзтеме. Алгъа суратларын ашырама да, ала жаратадыла эм аны жарым финалына чакъырадыла Москвагъа. Финалгъа чыгъып, анда да саугъалы жер алама. Кюстюмла, плащла, пальтола тикген фабрикладан бири мени бла келишим этеди да, ала бла бир къауум заман ишлейме. Алагъа кийимлени бичиулерин бардыргъанма.

   - Сени жыйрыкъларынг манга бек ауурла кёрюнедиле. Сора назик, субай къызгъа ала бла жолгъа чыкъгъан къыйын тюйюлмюдю? Ким болушады?

 - Тюз ангылагъанса. Ала къумачлары ауурла болгъандан сора да, инжиле бла да тигилгенлери себепли, бек ауурладыла. Аны себепли манга къачан да тамата къарындашым бла эгечим болушадыла. Аласыз бек къыйын боллукъ эди. Москвагъа биз аланы ариу бюклеп уллу сумкалагъа жыйышдырып автобусла бла ашырабыз. Кесибиз а самолёт бла учуп, барып алай алабыз. Къысхасын айтханда, ол быллай жолоучулукъну бек къыйын кезиуюдю дерге боллукъма.

   - Манга Москвада бардырылгъан быллай кёргюзтюуледе къызланы подиумда жюрюулери къачанда сейир кёрюнеди. Бизни миллет жыйрыкълагъа кёре, ала асыры эркин атлайдыла...

 - Хау, барды ол зат. Алай ала юйреннгенлерича жюрюйдюле. Айтып, ангылатхан да этебиз. Бир аздан унутуп, билгенлерича атлап тебирейдиле. Алай бир-бир модельерле стилизованный шёндюгюлю костюмланы алай кёргюзтюуню жаратадыла.

   - Озгъан жылны эсеплерине кёре, сен «Деловая высота -2024» деген саугъагъа тийишли болгъанса. Аны юсюнден айтсанг эди.

- Мени ол премияны алыргъа чакъыргъанларында сейир окъуна этген эдим. Алай, не букъдуруру кереклиси барды, этген ишиме аллай багъа берилгени бла, сёзсюз, ёхтемленеме. Сау болсунла аны къурагъанла. Мындан ары да этген ишими бютюнда бийик даражада бардырыргъа итинирикме.

     - Бош заманынг болса, аны къалай ётдюрюучюсе?

- Бош заманым болмайды. Болсада аны билимими айнытыугъа, бу ишде жангы амалланы тинтиуге жоралайма. Дагъыда батик бла ишлерге сюеме да, анга эс бёлюучюме. Алай жашаууму асламы жыйрыкъларым бла кюрешиуде ётеди. Мени оюмума кёре, адам бир ишни тутхан эсе, аны тынгылы этерге борчлуду.