Ёмюрлюк махтаулукъну бетлерин ачыкълай

Бу кюнледе Искусстволаны Шимал-Кавказ къырал институтунда «Ёчюлмезлик махтаулукъну бетлери» деген битеуроссей илму-практика конференция ётгенди. Ол Уллу Хорламны 80-жыллыгъына жораланнганды. Аны ишине КъМР-ни Парламентини Председатели Татьяна Егорова, Парламентни Маданият, граждан обществону эмда информация политиканы комитетини таматасы Текуланы Амырбий, институтну ректору Рахайланы Анатолий, къоншу регионладан, узакъ эмда жууукъ тыш къыралладан келген къонакъла, республикада болгъан вузланы келечилери да къатышхандыла. Заочно амал бла да 40-дан аслам адам къошулгъанды.

Жыйылыуну башлай, Рахайланы Анатолий бу илму конференцияны студентле къурагъанларын билдиргенди. «Аны бла биз Уллу Ата журт урушну жылларында, бюгюнлюкде да туугъан жерибизни ырахатлыгъы ючюн жанларын, къанларын да аямагъан жигитлерибизни эсгеребиз, алагъа ыразылыгъыбызны билдиребиз», - деп чертгенди ол.

Татьяна Егорова уа, конференциягъа къатышханланы алгъышлай, Уллу Ата журт урушда Хорламны келтирген совет халкъны аты ХХ ёмюрде дуния тарыхха махтау бла киргенин эсгертгенди.  «Аны ючюн совет халкъ бек уллу багъа бергенди, аны кёп адамы, ырысхысы да къоратылгъанды. Аны унутургъа жарарыкъ тюйюлдю. Уллу Ата журт урушну юсюнден тюз хапар, тёлюден тёлюге ёте, миллет эсибизни бир кесеги, генетика коду болгъанды. Бюгюнлюкде ол иш бютюн магъаналы жерни алады, нек дегенде кёпле экинчи дуния уруш бла байламлы тарых бла байламлы шартланы тюрлендирирге кюрешедиле. Бизни борчубуз - халкъыбызны тарыхын эсде тутуу бла чекленип къалмай, ёсюп келген тёлюлеге да аны  айтып ангылатыуду», - дегенди спикер.

Текуланы Амирбий да Уллу Ата журт урушда бизни ата-бабаларыбыз этгенни дуния башында бир къырал да этмегенин чертгенди. «Совет Союз 1418 кюнню ичинде къазауатда болгъанды эмда душманны тыпырына дери сюргенди. Ол кюйюсюз урушда аны 27 миллион адамы жоюлгъанды. Биз ол тарых магъаналы шартланы эсде тутаргъа эмда келир тёлюлеге айтып турургъа керекбиз», - дегенди.

Пленар жыйылыуда Гуманитар тинтиулени инстиутуну бёлюмюню башчысы, тарых илмуланы доктору Артур Кажаров, Пятигорскда къырал университетден Альмира Казиева, Абхазияны Илмула академиясыны президенти Зураб Джапуа, дагъыда башхала сёлешгендиле.

Конференцияны секцияларында Уллу Ата журт уруш баргъан кезиуде жашауну тарых-маданият жаны, Хорламны келтирген адабият, искусство, билим, юйретиу жоллары сюзюлгендиле. Алыкъа да атлары белгисиз болгъанлай къалгъан солдатланы излеу ишлени тохтатмазгъа кереклисини юсюнден да айтылгъанды. Битеу да эллиден артыкъ доклад этилгенди.  Филология илмуланы доктору, профессор Людмила Шауцукова уа докладла илму тинтиулеча бирге жыйышдырылып, китап чыгъарыллыгъын билдиргенди.

Конференциягъа къатышханлагъа сейир маданият программа да къуралгъанды.